91Èȱ¬

Mae arbenigwr y cyfryngau wedi dweud bod ymateb Llywodraeth Cymru i drafferthion S4C yn siomedig.

Dywedodd yr Athro Ian Hargreaves o Brifysgol Caerdydd wrth bwyllgor Aelodau Cynulliad ei bod hi'n bryd i Lywodraeth Cymru weithredu wrth ystyried dyfodol y sianel.

Mae S4C wedi wynebu sawl problem yn ystod y flwyddyn ddiwethaf ac mae trafodaethau am gytundeb cyllido newydd gyda'r 91Èȱ¬ yn parhau.

Dywedodd Llywodraeth Cymru eu bod yn trafod dyfodol S4C yn gyson.

Bu'r sianel heb brif weithredwr am flwyddyn wedi i Iona Jones adael ac mae'n wynebu nifer o broblemau, gan gynnwys bygythiad i swyddi a chwymp yn nifer y gwylwyr.

Mae ymgyrchwyr wedi bod yn protestio yn erbyn penderfyniad Llywodraeth San Steffan i drosglwyddo cyfrifoldeb ariannu'r sianel i'r 91Èȱ¬.

Yn 2010, fe gynhaliodd yr Athro Hargreaves yng Nghymru ar ran Llywodraeth Cymru - Adolygiad Hargreaves.

Un o'i argymhellion oedd yr angen i greu deialog gyhoeddus a pherthynas wleidyddol agosach gydag S4C.

Dywedodd yr athro wrth y pwyllgor, sy'n clywed tystiolaeth am ddyfodol y cyfryngau yng Nghymru, nad oedd yn credu bod Llywodraeth Cymru wedi gweithredu eu hargymhellion.

"Nid wyf yn credu bod llywodraeth Cymru wedi bod yn ddigon parod i ymateb ... rwy wedi fy siomi oherwydd ymateb Llywodraeth Cymru.

"Rwy wedi dilyn y sefyllfa yn agos iawn a dwi'n meddwl bod cyfle a chyfrifoldeb i Lywodraeth Cymru yn yr achos hwn.

"Fy nheimlad yw ei bod hi'n bryd i Lywodraeth Cymru ddechrau gweithredu."

Ychwanegodd: "Dwi ddim yn hapus gyda'r modd y maen nhw wedi delio gyda mater S4C dros y flwyddyn ddiwethaf - dwi'n amau bod neb yn hapus.

"Ond mae'n bosib troi'r trefniadau newydd yn llwyddiant beth bynnag fydd y rheini yn y pen draw."

Dywedodd llefarydd ar ran Llywodraeth Cymru eu bod wedi mynegi eu pryderon i Lywodraeth y DU am effaith y toriadau ar S4C.

"Er bod cyfrifoldeb am, a chyllido, S4C yn fater i Lywodraeth y DU, mae safbwynt Llywodraeth Cymru yn glir - mae'r cynnig y dylai cyllid S4C yn y dyfodol ddod oddi wrth y 91Èȱ¬ yn hollbwysig i Gymru, yr iaith Gymraeg a'r sector diwydiannau creadigol.

"Mae'r Prif Weinidog Carwyn Jones a'r Gweinidog Treftadaeth Huw Lewis wedi dweud ei bod hi'n hanfodol i S4C barhau yn annibynnol yn olygyddol ac yn weithredol oddi wrth y 91Èȱ¬.

"Mae'n bwysig i'r drefn gyllido gael ei gosod ar seiliau hir dymor, cadarn.

"Rydym yn credu bod angen adolygiad sylfaenol o S4C er mwyn llunio strwythur y sianel yn y dyfodol."