91Èȱ¬

Thill Mòrag gu Cùirt Eden san Dùbhlachd far an robh i a’ cuimhneachadh air ais air Mòd Inbhir Nis a ghabh pàirt an sin an-uiridh. Bha seachdain a’ Mhòid eadar-dhealaichte do Mhòrag fhèin agus rinn i an gnothach air ceòl is òrain gu leòr a thoirt thugainn à Cùirt Eden tron t-seachdain far an robh i a’ mire gach là. Anns a’ phrògram seo tha sinn a’ faighinn blasad dha na seinneadairean agus an luchd-ciùil a thadhail oirre.

Diluain chur i fàilte air dà ghinealach de chlann Mhic a’ Mhaoilein Calum Ailig agus a mhac Fionnlagh. Bha Fionnlagh eile an làthair cuideachd, Fionnlagh MacIllFhinnein.

Dimàirt bha Karen Elder agus Ciorstaidh NicNeacail ann am fonn leis na h-òrain agus bha an ceòl aig Iain MacAonghais agus Coll Dòmhnallach.

Diciadain fhuair Alasdair Barnett air stad airson còig mionaidean airson òran a ghabhail am measg a h-uile rud eile a bh’ aige ri dhèanamh an t-seachdain sin. Agus abair gun robh Mairead NicIllFhialain agus Fiona NicChoinnich ann an sunnd iad fhèin a’ cur an guthan air ghleus a’ chiad char sa mhadainn.

Diardaoin chur i fàilte air luchd nan buinn òir, John Jo MacNèill is Màiri Callan. Agus bha òrain rin cluinntinn bho Ellen NicDhòmhnaill, Alasdair Whyte agus Ruairidh Gray.

Agus Dihaoine thàinig iad nam pailteas. A’ toirt thugainn a’ chiùil bha còmhlan cèilidh Monach Isles agus balaich beagan nas òige, b’ iad sin an còmhlan Cala. Bha clann MhicCarmaig ann, luchd glèidhidh an aigeallan airgid, Shona is Pàdraig agus cuideachd Màiri a ghabh pàirt san fharpais. Bha seann eòlaichean ann leithid D I MacIlleDhuinn, Steven MacÌomhair agus Joy Dunlop. Bha anail gu leòr aig Saffron Hanvidge agus i a’ dalladh air puirt-a-beul agus rinn seinneadairean òga leithid Isabelle Sommerville an debut aice air prògram Mhòraig. Bha am bèicear agus a chompanach ann an deagh fhonn cuideachd is iad a’ seinn nan càraid agus b’ ann a’ seinn mun a’ churrachd ruadh a bha Eòghainn Stìubhart. Thug Kerry Cheannadach dhuinn òran agus i cuideachd a’ cuimhneachadh bliadhna bho phòs I agus b’ ann ag aithris bàrdachd neo a‘ seinn a bhàrdachd aig Somhairle MacIllEathain a bha Teàrlach Quinnell. Agus mu dheireadh luchd- glèidhidh buinn oir an t-seann nòis bha òrain rin cluintinn bho Emma NicLeòid agus Calum MacColla.