91Èȱ¬

Tha greis ann bho bha cuid de phreusantan Santa air an ithe agus air an òl agus air an cosg, ach tha cuid de rudan ann is gheibhear air feum a dhèanamh leotha fad bhliadhnaichean mòr às dèidh làimhe. 'S e aon dhiubh sin leabhar reasabaidhean. Dè na leabhraichean a fhuair daoine aig àm na Nollaige agus dè na rinn iad asta mu thràth – gheibh Cathy NicDhòmhnaill còmhradh ri triùir a tha measail air còcaireachd.

Tha sgoiltean ann an Alba a’ dol air ais gu teagasg san dachaigh airson a' chiad ghreis dhan teirm ùr. Dè na leasain a dh'ionnsaich pàrantan bho bhith dèanamh seo an-uiridh, agus ciamar a tha iad a’ faireachdainn mu dheidhinn tilleadh thuige. Tha Cathy a' faighneachd a bheil comhairle sam bith ann a thèid aca air a thoirt seachad dhan fheadhainn a fhuair cùisean duilich?

Aig toiseach na bliadhna an-uiridh bha na naidheachdan làn dhe na teintean cianail a bh' ann an Astràilia, agus bha àrd-choinneamh gu bhith air a chumail ann an Glaschu a’ coimhead ri suidheachadh na h-àrainneachd. Fad na bliadhna roimhe sin bha Extinction Rebellion a' tarraing aire dhaoine gu cor an t-saoghail, barrachd aire na bha a-riamh. Bha gu leòr a' meas gur e 2020 a' bhliadhna a thigeadh atharrachadh nar dòighean agus gun sguireadh an sgrìos a bha ga dhèanamh air an t-saoghal. Ach chaidh tòrr dhen iomairt sin air chall ri linn Covid. Am bheil sinn air an cothrom a b’ fheàrr a bh' againn air an àrainneachd a shàbhaladh a chall?