91Èȱ¬

Ynys Môn fydd cartref Eisteddfod yr Urdd 2026.

Mewn cyfarfod yn Llangefni nos Iau, cafodd gwahoddiad swyddogol ei hestyn gan wirfoddolwyr.

Y tro diwethaf i'r ŵyl ymweld â'r ynys oedd yn 2004 ar faes Sioe Môn ger Gwalchmai.

Mae'r ŵyl yn denu dros 100,000 o ymwelwyr i'r maes bob blwyddyn.

Fe fydd yr ŵyl yn cael ei chynnal rhwng 25-31 Mai 2026.

Mewn cyfarfod cyhoeddus yn Ysgol Corn Hir, dywedodd Cyfarwyddwr Eisteddfod yr Urdd, Siân Eirian, mai "braf iawn oedd gweld cefnogaeth unfrydol gan gynrychiolwyr ar hyd yr Ynys yn y cyfarfod heno i wahodd Eisteddfod yr Urdd nôl i Ynys Môn yn 2026".

"Fel Mudiad rydym yn edrych ymlaen yn fawr i ddychwelyd unwaith eto yn 2026 ac yn diolch o galon i Gyngor Sir Ynys Môn, ein hieuenctid, a'r holl wirfoddolwyr am eu brwdfrydedd a'u cefnogaeth arbennig."

Mae "eisoes llawer o frwdfrydedd a pharodrwydd yn lleol i groesawu'r Eisteddfod", meddai Arweinydd Cyngor Môn, Llinos Medi.

Dywedodd y byddai'n "gyfle unigryw i arddangos Ynys Môn ar lefel genedlaethol".

Yn ystod cyfarfod llawn o'r cyngor sir fis diwethaf, cafodd cynnig gan yr arweinydd i wahodd yr ŵyl ei basio'n unfrydol.

"Hoffwn ddiolch i fy nghyd-aelodau o'r Cyngor Sir am eu cefnogaeth unfrydol i ddod ag Eisteddfod Genedlaethol yr Urdd i'r Ynys.

"Rydym ni gyd yn cydnabod ei phwysigrwydd o ran ein pobl ifanc, yr economi leol a'r Gymraeg."

Llanymddyfri oedd lleoliad yr ŵyl eleni, ac yna ardal Meifod fydd ei lleoliad y flwyddyn nesaf.

Yn 2025, Parc Margam fydd cartref yr ŵyl, wrth i'r Eisteddfod ddychwelyd i Gastell-nedd Port Talbot am y tro cyntaf ers 2003.