91Èȱ¬

Mae disgwyl i benderfyniad gael ei wneud ddydd Mercher a fydd gêm Cymru yn erbyn Lloegr yn y Chwe Gwlad yn mynd yn ei blaen.

Wrth i'r ffrae am gytundebau barhau, mae chwaraewyr rygbi Cymru wedi rhoi tan 22 Chwefror i Undeb Rygbi Cymru (URC) ddatrys yr anghydfod.

Maen nhw wedi bygwth gwrthod chwarae yn erbyn Lloegr yn Stadiwm Principality ddydd Sadwrn.

Dywedodd y sylwebydd rygbi, Gareth Charles y gallai gohirio neu ganslo'r gêm fod yn "ddechrau diwedd" URC.

"Mae rygbi Cymru ac Undeb Rygbi Cymru ar groesffordd," meddai ar raglen Dros Frecwast 91Èȱ¬ Radio Cymru fore Mercher.

"Mae delwedd Rygbi Cymru wedi cael ei sarnu fel ma'i dros y misoedd diwethaf, ond petai'r gêm yma ddim yn cael ei chwarae, i mi dyma ddechrau diwedd Undeb Rygbi Cymru.

"Mae sylw'r byd rygbi arnyn nhw ac mae sylw'r byd yn gyffredinol arnyn nhw."

Hefyd ar y rhaglen rhybuddiodd Huw Jones - cyn-bennaeth Chwaraeon Cymru ac aelod o Ymddiriedolaeth Rygbi CF10, corff annibynnol sy'n cynrychioli clybiau Caerdydd - am yr oblygiadau ariannol os na fydd y gêm yn cael ei chwarae.

"Ar y funud 'dan ni 'di gweld yr undeb yn colli rhyw £1.5m ar ôl diswyddo Wayne Pivac ac arwyddo Warren Gatland," meddai.

"Mi fyddan ni wedi colli arian ar ôl colli'r ddwy gêm gyntaf o Bencampwriaeth y Chwe Gwlad. Hefyd, 'w'rach y bydd URC yn cael dirwy gan bwyllgor y Chwe Gwlad os na fyddai'r gêm yn mynd yn ei blaen.

"Felly byddai'n hawdd gweld ni'n colli rhywbeth fel £12m, yn hawdd, ac mae hynny yn mynd i effeithio ar bopeth, a fydd y gêm yn cael ei rheoli, os ydan ni'n lwcus, gan fanc NatWest."

Ddydd Mawrth, fe ddywedodd Warren Gatland ei fod yn "hyderus" y bydd y gêm yn mynd yn ei blaen ac y bydd "datrysiad" yn dilyn trafodaethau.

Roedd Gatland wedi gohirio cyhoeddi'r tîm ar gyfer y gêm oherwydd "diffyg eglurder y sefyllfa".

Ond dywedodd ei fod yn clywed "pethau positif" gan chwaraewyr a staff URC ynghylch parhau â'r gêm ddydd Sadwrn.

Ar hyn o bryd, mae gan hyd at 70 o chwaraewyr yng Nghymru gytundebau sy'n dod i ben ddiwedd y tymor, ac felly dydyn nhw ddim yn gwybod a fydd ganddyn nhw swydd wedi mis Mehefin.

Mae URC yn dweud eu bod wrthi'n ffurfio cytundebau ariannol gyda'r pedwar rhanbarth - Y Dreigiau, Caerdydd, Gweilch a'r Scarlets.

Dechreuodd y trafodaethau ym mis Ionawr 2022, a rhoddodd y Bwrdd Rygbi Proffesiynol sêl bendith i gytundeb ariannol chwe blynedd rhwng URC a'r rhanbarthau fis Rhagfyr, ond dyw'r cytundeb ddim wedi'i arwyddo hyd yma.

Heb gytundeb cadarn dyw'r rhanbarthau ddim yn gallu ffurfio cytundebau gyda chwaraewyr - ac fe allai rhai fod yn ddi-waith mewn rhai misoedd.

Mae'r chwaraewyr hefyd yn galw am gynrychiolaeth mewn cyfarfodydd o'r Bwrdd Rygbi Proffesiynol (PRB) yn ogystal â chael gwared ar y rheol 60 cap.

Mae hynny'n golygu na fydd rhywun sy'n chwarae i glwb y tu allan i Gymru yn cael ei ddewis i'r tîm cenedlaethol os nad ydyw eisoes wedi ennill 60 o gapiau.