91Èȱ¬

Pan fu farw'r Frenhines, fe etifeddodd ei mab, Charles, cyn-Dywysog Cymru, y goron yn syth.

Ond, mae sawl cam ymarferol a thraddodiadol cyn y daw yn Frenin yn swyddogol.

Bydd yn cael ei adnabod fel Brenin Charles III.

Dyna oedd penderfyniad cyntaf ei deyrnasiad. Fe allai fod wedi dewis unrhyw un o'i bedwar enw - Charles Philip Arthur George.

Nid ef yw'r unig un fydd derbyn teitl newydd.

Bydd gwraig y Brenin, Camilla, yn cael ei hadnabod fel y Frenhines Gydweddog.

Wrth anerch y wlad ddydd Gwener, dywedodd y Brenin Charles y byddai ei fab, William, a'i wraig yntau Kate, yn cymryd y teitlau Tywysog a Thywysoges Cymru.

Fe wnaeth y Brenin Charles III wneud cyhoeddiad swyddogol i'r Deyrnas Unedig ar y teledu nos Wener.

Roedd hynny yr un pryd â gwasanaeth arbennig yng Nghadeirlan St Paul, ble'r oedd Prif Weinidog y DU Liz Truss a Maer Llundain Sadiq Khan.

Bydd Charles yn cael ei gyhoeddi'n swyddogol fel Brenin am 10:00 ddydd Sadwrn. Bydd hyn yn digwydd ym Mhalas St James yn Llundain o flaen y corff seremonïol, Cyngor yr Esgyniad.

Mae'r Cyngor yn cynnwys aelodau'r Cyfrin Gyngor - grŵp o uwch ASau presennol a blaenorol - ynghyd â rhai gweision sifil, uwch gomisiynwyr y Gymanwlad, ac Arglwydd Faer Llundain.

Bydd Proclamasiwn yn cael ei ddarllen yn y cyfarfod. Yn draddodiadol, mae'n gyfres o weddïau a llwon sy'n canmol y Frenhines flaenorol ac yn datgan cefnogaeth i'r Brenin newydd.

Fel gyda phob un o'r seremonïau hyn, bydd llawer o sylw'n cael ei roi i'r hyn allai fod wedi cael ei addasu, ychwanegu neu ddiweddaru yn y Proclamasiwn, fel arwydd o oes newydd.

Bydd y Brenin yn mynychu ail gyfarfod gyda Chyngor yr Esgyniad a'r Cyfrin Gyngor.

Yn dilyn ffanffer, bydd proclamasiwn cyhoeddus yn cael ei wneud o falconi ym Mhalas St James yn datgan mai Charles yw'r Brenin.

Bydd Uwch Frenin yr Arfau yn cyhoeddi "God save the King", ac am y tro cyntaf ers 1952, bydd yr anthem yn cael ei chanu gyda'r geiriau hynny.

Bydd gynau'n tanio salíwt yn Llundain ac ar hyd y Deyrnas Unedig a bydd y proclamasiwn sy'n cyhoeddi Charles fel y Brenin newydd yn cael ei ddarllen yng Nghaerdydd, Caeredin a Belfast.

Dyma fydd y seremoni swyddogol lle fydd Charles yn cael ei goroni.

Oherwydd y paratoadau sydd eu hangen, mae disgwyl oedi tan y bydd hyn yn digwydd. Fe etifeddodd y Frenhines Elizabeth y goron yn Chwefror 1952, ond ni chafodd ei choroni'n swyddogol nes Mehefin 1953.

Ers 900 o flynyddoedd, mae'r coroni wedi digwydd yn Abaty Westminster. Mae'n wasanaeth crefyddol sy'n cael ei gynnal gan Archesgob Caergaint. Mi fydd yn gosod y Goron ar ben Charles - coron aur o 1661.

Yn wahanol i briodasau brenhinol, mae'r coroni yn achlysur y wladwriaeth - y llywodraeth sy'n talu amdano, ac yn ei hanfod, yn dewis y gwesteion.

Bydd cerddoriaeth a darlleniadau a bydd y Brenin newydd yn tyngu llw'r coroni o flaen llygaid y byd.

Charles yw pennaeth newydd y Gymanwlad - sefydliad o 56 o wledydd annibynnol a 2.4 biliwn o bobl.

Ar gyfer 14 o'r gwledydd rheiny, ynghyd â'r DU, y Brenin yw pennaeth y wladwriaeth.