91Èȱ¬

Ers wythnosau mae criw o wirfoddolwyr a staff elusen Mind Llanelli wedi bod wrthi yn adnewyddu ac atgyweirio hen siop yn y dref.

Bydd y ganolfan amlbwrpas newydd yn cynnig gwasanaeth cwnsela, hyfforddi a hyd yn oed llety dros nos i bobl mewn argyfwng.

Yn eu plith mae Mathew Bowler, 25 oed. Mae e wedi wynebu iselder yn y gorffennol.

"Fe es i drwy gyfnod tywyll. Nes i ddim cael lot o lwyddiant yn yr ysgol a methu arholiadau TGAU i gyd," meddai.

"Mae gyda fi 'chydig o awtistiaeth felly doedd hynna ddim yn help chwaith. Ro'n i byth yn teimlo bo' fi yn ffitio mewn.

"Nawr fi mas o hynna fi moyn helpu pobl, a fi'n gobeithio gweithio ym maes iechyd meddwl a gwirfoddoli gyda Mind yn Llanelli."

Mae Mathew yn edrych ymlaen at ddechrau pennod newydd yn ei fywyd ar ôl cyfnod anodd a heriol.

Mae'n dweud bod galw cynyddol am help ymysg pobl ifanc yn yr ardal, ac yn gobeithio y bydd y ganolfan newydd yn help i sicrhau bod ieuenctid eraill yn cael y cyfle a'r help sydd ei angen arnyn nhw wrth wynebu iselder.

"Mae canolfan fel hyn yn bwysig iawn i bobl ifanc fy oedran i, a phobl iau," meddai.

"S'dim lot o help i gael mas yna. Chi'n gorfod cael referrals, mae hynna'n gallu cymryd amser, a chi'n cael eich troi lawr wedyn.

"Rwy 'di colli cymaint o ffrindiau - pobl ifanc sy' wedi lladd eu hunain achos bo' nhw ddim yn cael eu gweld mewn pryd."

Bydd y ganolfan newydd yn cynnig gwasanaeth tu fas i oriau swyddfa, ac mae galw am ehangu gwasanaethau o'r fath ar hyd a lled Cymru.

Yn ôl elusen Mind Cymru mae galw am gefnogaeth i bobl pan fod angen, a hefyd mae'n rhaid gneud yn siŵr ei bod hi yn hawdd cael mynediad ato.

"Mae gwasanaethau gyda'r nos yn hynod bwysig," medd Mathew Bowler.

"Mae lot o bobl sy ag iselder yn aros lan yn hwyr y nos, a does neb o gwmpas bryd hynny a ma' ishe rhywun arnyn nhw i gefnogi nhw ac i siarad â nhw.

"Fe fydden i'n hoffi gweld gwasanaethau a help ar gael 24 awr y dydd."

Mae Mind Llanelli yn dweud eu bod wedi siarad â thua 10,000 o bobl yn y flwyddyn ddiwethaf ac wedi cynnig gwasanaethau cymorth i tua 1,500.

Maen nhw yn gobeithio y bydd y ganolfan newydd yn eu helpu nhw i gyrraedd a helpu mwy o bobl eto, a hefyd yn fodd i godi ymwybyddiaeth am iechyd meddwl.

Eu nod yw sicrhau mwy o lwyddiant fel stori Mathew, sydd nawr yn dweud ei fod wedi troi cornel, yn "dod allan o iselder, yn teimlo yn rili dda ac yn edrych 'mlaen nawr at y cyfle i helpu pobl eraill a gwirfoddoli gyda Mind Llanelli".