91Èȱ¬

Mae pennaeth tîm sy'n ymchwilio i gynnydd mewn achosion coronafeirws ymhlith pobl yn eu harddegau yn y gogledd wedi cadarnhau eu bod yn cael eu trin fel clystyrau o'r amrywiolyn Delta.

Cadarnhaodd Cyngor Sir Ddinbych bod yna 25 o "achosion cysylltiedig" sydd "wedi'u cysylltu â nifer o bobl yn ymgynnull ac mae achosion yn cael eu nodi mewn nifer o leoliadau, gan gynnwys ysgolion".

Dywed y cyngor nad yw pob un o'r achosion wedi'u cadarnhau fel achos o amrywiolyn Delta ond bod "cyfanswm o 428 o ddisgyblion yn hunan-ynysu" am 14 diwrnod o dair o ysgolion y sir.

Yr ysgolion yw Ysgol Brynhyfryd, Rhuthun, Ysgol Uwchradd Dinbych ac Ysgol Santes Ffraid, sydd hefyd yn Ninbych.

Daeth i'r amlwg ddydd Gwener bod yna 10 achos cysylltiedig o'r feirws, ac roedd y cyfanswm wedi codi i 25 erbyn dydd Llun.

Dywed cadeirydd Tîm Rheoli Digwyddiad y sir, Nicola Stubbins: "Nid yw pob achos wedi'i gadarnhau fel amrywiolyn Delta, ond y straen yw'r amrywiolyn amlycaf yn y DU ac rydym yn trin y profion positif cysylltiedig hyn fel amrywiolyn Delta.

"Mae'r amrywiolyn Delta yn fwy trosglwyddadwy, a glynu wrth y canllawiau yw'r ffordd orau o arafu ei ledaeniad o fewn ein cymunedau."

Ychwanegodd: "Mae ymddangosiad yr achosion newydd hyn yn ein hatgoffa na ddylem fod yn hunanfodlon, hyd yn oed wrth i gyfraddau'r feirws ledled Cymru aros yn isel.

"Mae'n hanfodol nad yw preswylwyr yn ymgynnull gyda phobl eraill, sy'n mynd yn groes i ganllawiau Covid-19 Llywodraeth Cymru."

Dywedodd Ms Stubbins fod angen i bobl barhau i "fod yn wyliadwrus" a dilyn y rheolau, gan gynnwys gwisgo gorchudd wyneb mewn mannau dan do a chadw pellter cymdeithasol.

Mae ymholiadau'n parhau, meddai, ac mae disgwyl canlyniadau profion pellach.

Gofynnir i unrhyw sy'n sydd â symptomau drefnu prawf mor fuan â phosib, ac i bobl sydd heb symptomau drefnu profion llif unffordd rheolaidd gartref.

Mae rhestr ehangach o symptomau wedi eu cyhoeddi yn sgil amrywiolyn Delta gan gynnwys:

Mae yna safle profi ychwanegol erbyn hyn yng Nghaledfryn yn Ninbych, ar ben y canolfannau oedd eisoes ar waith yn Y Rhyl a Llangollen, ond mae angen archebu lle o flaen llaw.