91Èȱ¬

Wedi'r golygfeydd o barcio peryglus yr haf diwethaf, mae Awdurdod Parc Cenedlaethol Eryri yn gobeithio atal ailadrodd yr anrhefn drwy gyflwyno cyfres o newidiadau eleni.

Maen nhw'n cynnwys system archebu parcio o flaen llaw, sgriniau gwybodaeth a rhagor o wasanaethau bws.

Wrth i ymwelwyr gael dychwelyd i ardaloedd fel gogledd Cymru, prysuro fydd hi rŵan ym mynyddoedd Eryri.

Roedd y golygfeydd o geir wedi'u gadael yn anghyfreithlon ar hyd ochr y lôn ar odrau'r mynyddoedd yn gur pen i Awdurdod Parc Cenedlaethol Eryri a'r cymunedau lleol.

Un o'r prif gynlluniau eleni ydy'r system archebu parcio o flaen llaw ym Mhen-y-Pass, man cychwyn rhai o'r llwybrau mwya' poblogaidd i fyny'r Wyddfa.

Bydd y cynllun yn rhedeg drwy gydol yr haf yn dilyn peilot llwyddiannus dros ychydig fisoedd y llynedd.

Dywedodd Angela Jones, rheolwr partneriaethau Awdurdod Parc Cenedlaethol Eryri: "'Da ni'n gweithio efo cwmni o'r enw JustPark felly mae'n rhaid i chi gael yr ap, neu mi fedrwch chi wneud o'n syth dros y we hefyd.

"Mae'n rhaid bwcio o flaen llaw. Mae'n rhaid ei wneud o cyn y diwrnod 'da chi'n teithio, felly dydych chi ddim yn cael ei wneud o fewn 24 awr i'r diwrnod 'da chi am ddod."

Ychwanegodd: "Felly mae'n rhaid cynllunio o flaen llaw.

"'Da ni eisiau i bobl feddwl be' maen nhw'n mynd i wneud yma yn Eryri cyn bo' nhw'n dod, lle maen nhw'n mynd i barcio, lle maen nhw'n mynd i aros a be' maen nhw'n mynd i weld.

"Mae'n mynd i gostio ychydig bach yn fwy - ond yn llai na'r peilot yr ha' diwetha'.

"Ond mae'r gost ychwanegol yn mynd tuag at y bysus sherpa ychwanegol 'da ni wedi'u rhoi ymlaen efo Cyngor Gwynedd, a hefyd mae'n cyfrannu at dalu'r swyddogion diogelwch sydd angen eu cael yma dros nos.

"Mae 'na rywun ar y safle yma 24 awr y dydd."

I lawr y dyffryn o Ben-y-Pass, mae 'na newidiadau hefyd ar y safle parcio a theithio yn Nant Peris, fel y sonia Catrin Glyn o Bartneriaeth Yr Wyddfa.

"Un o'r pethau eraill 'da ni wedi'u rhoi mewn lle y flwyddyn yma ydy'r sgrin ddigidol yma," meddai.

"Er bod ni wedi gorfod tynnu'r elfen gyffwrdd o'r sgrin am y tro oherwydd Covid, mae pobl yn dal i allu gweld y negeseuon crai, er enghraifft bod Hafod Eryri - yr adeilad a chaffi ar gopa'r Wyddfa - wedi cau a'i bod hi'n well i bobl ddefnyddio cyfleusterau toiled cyn mynd fyny ac ati.

"Mae 'na hefyd amserlen bws fel bod pobl yn gallu gweld yn union pryd mae 'na fysus i'w cludo nhw i Ben-y-Pass neu Lanberis."

Ychwanegodd Ms Glyn: "'Da ni wedi gorfod addasu'r ffordd 'da ni'n rhannu gwybodaeth efo'r cyhoedd yn ystod y pandemig - mae 'na lawer mwy ar y we erbyn hyn.

"Mae ganddon ni hefyd wirfoddolwyr yn rhoi gwybodaeth i ymwelwyr ar y llwybrau i gyd ac yn casglu sbwriel, ac mi fydd 'na fan wybodaeth fydd yn teithio o gwmpas troed Yr Wyddfa yn cynnig llwyth o wybodaeth hanfodol i ymwelwyr."

Mae digon ar droed felly wrth i gerddwyr o bell ac agos ddod i Eryri eleni ac os bydd cynlluniau fel y system archebu parcio'n llwyddiant, fe allai gael ei ehangu i faes parcio Cwm Idwal yn Ogwen.

Y gobaith ydy y bydd pobl yn gallu crwydro'r copaon heb ailadrodd anhrefn y llynedd.