91Èȱ¬

Mae manylion adolygiad annibynnol o'r broses o ddyfarnu canlyniadau arholiadau yng Nghymru'r haf hwn wedi eu cyhoeddi gan y gweinidog addysg.

Dywedodd Kirsty Williams ei fod yn "hanfodol fod gwersi'n cael eu dysgu" o'r profiad eleni.

Fe ymddiheurodd y gweinidog "yn ddiamod" am y modd y deliwyd gyda chanlyniadau Safon Uwch disgyblion, wedi i'r llywodraeth wneud tro pedol ar y ffordd yr oedd graddau'n cael eu safoni.

Roedd miloedd o ganlyniadau Lefel A wedi eu gostwng yn wreiddiol dan broses safoni, cyn i asesiadau athrawon gael eu defnyddio wedi gwrthwynebiad chwyrn.

Mae Ms Williams wedi cadarnhau y bydd yr adolygiad annibynnol "yn ystyried cwestiynau allweddol sydd wedi codi yn sgil y trefniadau a sefydlwyd ar gyfer cymwysterau yr haf hwn, a'r heriau a wynebwyd yn 2020".

"Mae'n hanfodol bod gwersi yn cael eu dysgu yn sgil profiad eleni, er mwyn gallu llunio argymhellion a nodi materion i'w hystyried ar gyfer 2021.

"Bydd yr argymhellion hyn yn canolbwyntio ar anghenion ein dysgwyr a'u cynnydd, ac ar yr angen i barhau i gynnal safonau ac uniondeb y system addysg a chymwysterau yma yng Nghymru.

Dywedodd Ms Williams y bydd yr adolygiad yn cael ei gadeirio gan Gyfarwyddwr y Brifysgol Agored yng Nghymru, Louise Casella.

Ychwanegodd ei bod wedi gofyn am "adroddiad interim o'r prif ganfyddiadau erbyn diwedd Hydref, ac adroddiad terfynol ac argymhellion erbyn canol Rhagfyr" o achos "angen dybryd i sefydlu mesurau ar gyfer cyfres arholiadau 2021".