91Èȱ¬

Mae pobl yn cael eu cynghori i dderbyn eu brechiadau unwaith eto, gan fod cynnydd yn y rhestr aros yn dilyn y pandemig coronafeirws.

Mae 'na bryder y bydd pobl yn dewis cadw draw o glinigau brechu yr hydref hwn o achos ofnau am yr haint.

Roedd y broses o ddosbarthu brechlynnau ar gyfer cyflyrau fel niwmonia a'r eryr wedi ei atal am y tro yn ystod y cyfnod clo.

Gan fod disgwyl i glinigau ffliw ailagor yn fuan, fe all hyn achosi mwy o bwysau ar glinigau sydd wedi gorfod addasu i gydymffurfio gyda rheolau pellhau cymdeithasol.

Mae meddygon yn rhybuddio y gallai rhai cyflyrau effeithio ar bobl yn waeth os ydynt yn cael eu heintio gan coronafeirws a heb dderbyn eu brechiadau o flaen llaw.

Dywedodd Theresa Owen, cyfarwyddwr iechyd cyhoeddus Bwrdd Iechyd Betsi Cadwaladr: "'Da ni wrthi yn trio cael pawb i gael eu brechiadau ar amser - plant ac oedolion - ond ar hyn o bryd 'da ni'n trafod yr eryr yn arbennig.

"Mae 'na frechlyn ar gyfer yr eryr i bobl hyn, a hefyd meningitis i'r myfyrwyr sydd yn mynd i'r coleg am y tro cyntaf.

"Mae'n hynod bwysig fod pawb yn cael eu brechlyn ar amser.

"Mae Covid yn rhywbeth newydd i ni ond ryda ni eisiau gwneud yn siŵr fod pawb yn optimeiddio eu hiechyd ac yn edrych ar ôl eu hunain, a rhan o hynny yw gwneud yn siŵr eich bod yn cael eich brechiadau ar amser."

Pwysleisiodd fod clinigau brechiadau'n llefydd diogel, i unrhyw un oedd yn pryderu am y peryglon o gael eu heintio gyda Covid-19.

"Mae'n clinigau ni a'n hysbytai ni yn llefydd diogel iawn - ryda ni'n eu glanhau yn aml, mae ganddo ni y gweithredoedd pellteroedd yn eu lle - gyda phobl yn gwisgo gorchudd wynebau hefyd.

"'Da ni wedi cymryd pob cam i sicrhau eu bod yn lân ac yn addas a'r brechlyn yw'r peth pwysig."

Gall mwy o bobl gael brechiad ffliw am ddim y gaeaf hwn, rhag ofn y bydd cynnydd eto mewn achosion coronafeirws.

Ychwanegodd Theresa Owen: "Mae'r brechlyn ffliw yn hynod o bwysig i ni. 'Da ni wrthi bob amser yn yr hydref ac felly fydd hi ddim yn hir pan fyddwn ni'n dechrau cynllunio ac wedi bod wrthi ers cryn amser.

"Ond eleni mi fydd y brechlyn ffliw yn hynod bwysig a da ni'n annog pawb i ddod i gael eu brechlyn.

"Fe fydd hyn yn ein helpu ni wrth y drws ffrynt gan ei bod hi'n brysur a 'da ni'n gorfod cymryd y mesurau cadw pawb yn ddiogel drwy'r amser."

Yn amodol ar gadarnhad gan Lywodraeth y DU, bydd cyflenwad ychwanegol o'r brechlyn ffliw ar gael eleni hefyd.

Bydd y canlynol yn cael eu cynnwys yn y rhaglen frechu eleni:

Bydd cyflenwadau ychwanegol o'r brechlyn ffliw ar ffurf chwistrell trwyn, sy'n cael ei gynnig i blant, yn cael eu defnyddio i sicrhau bod y nifer mwyaf posibl o blant yn cymryd rhan yn y rhaglen frechu medd Llywodraeth Cymru.

Bydd plant rhwng dwy a thair oed a phob plentyn mewn ysgolion cynradd yn cael cynnig y brechlyn ffliw.