91Èȱ¬

Y peth olaf y mae Cymru ei hangen nawr yw creu diwylliant o "godi cywilydd" ar bobl sydd ddim yn gwisgo mygydau, yn ôl Prif Swyddog Meddygol Cymru.

Cymru yw'r unig wlad yn y DU sydd heb argymell y dylai pobl wisgo mygydau er mwyn atal lledaeniad coronafeirws.

Ond wrth siarad â'r 91Èȱ¬, dywedodd Dr Frank Atherton fod manteision eu gwisgo wedi cael ei or-bwysleisio i raddau, a bod anfanteision ymarferol ynglÅ·n â'u gwisgo hefyd.

Ychwanegodd nad oedd am weld "diwylliant o ddrwgdybiaeth" yn cael ei greu o gwmpas y mater.

Dywedodd bod glendid sylfaenol ac ymbellhau cymdeithasol yn gallu gwneud mwy o wahaniaeth wrth leihau'r risg o ddal yr haint na gorfodi pobl i wisgo mygydau.

"Fy nghyngor i yw y dylai pobl eu gwisgo nhw os ydyn nhw'n dewis gwneud hynny, ond na ddylai fod yn orfodol," meddai wrth siarad ar 91Èȱ¬ Radio Wales.

"Ddylen ni ddim bod yn dweud fod rhaid i bobl wisgo mygydau yma yng Nghymru, ond yn amlwg mae ganddyn nhw'r hawl i wneud hynny os ydyn nhw'n dewis."

Dywedodd fod y manteision o wisgo mygydau yn "eithaf bychan".

Roedd y grŵp cynghori SAGE wedi dod i'r casgliad fod yna "fantais fechan ond bod hynny'n seiliedig ar dystiolaeth wan iawn".

Ond rhybuddiodd Dr Atherton na ddylai pobl sydd â symptomau coronafeirws feddwl y gallen nhw wisgo mwgwd a gadael y tŷ.

"Mi fyddai hynny'n beryglus dros ben. Dylai pobl sydd â symptomau fod yn aros adref," meddai.

"Mae yna risg hefyd y bydd pobl yn dechrau defnyddio cyflenwadau [o fygydau] a ddylai fod yn mynd i'r gwasanaeth iechyd, a fedrwn ni ddim peryglu cyflenwadau offer diogelwch PPE y GIG.

"Y trydydd pwynt yw fy mod yn poeni'n arw am greu awyrgylch o ddrwgdybiaeth.

"Y peth olaf y mae Cymru ei hangen nawr yw creu rhyw fath o ddiwylliant o "godi cywilydd" ar bobl os nad ydyn nhw'n gwisgo mygydau.

"Mae'n rhaid canolbwyntio ar fesurau glendid sylfaenol ac ymbellhau cymdeithasol, peidio cyffwrdd ein hwynebau pan fedrwn ni osgoi hynny, a chadw pellter.

"Dyma ydy'r pethau allai wneud gwahaniaeth, ac nid dibynnu ar orfodi pobl i wisgo mygydau."