91Èȱ¬

Mae'r manylion am sut y bydd pob gorsaf rheilffordd yng Nghymru yn elwa o fuddsoddiad gwerth £194m wedi cael ei gyhoeddi.

Yn ôl Trafnidiaeth Cymru mae'n cynnwys adfywiad mawr o orsaf Abertawe a 1,500 o lefydd parcio ychwanegol ger gorsafoedd ar draws y wlad.

Dywedodd prif swyddog gweithredol Trafnidiaeth Cymru, James Price ei fod "llawer mwy na'r hyn sydd wedi'i wario ar orsafoedd yng Nghymru o'r blaen".

"Yn hollbwysig, bydd lefel llawer uwch o ddiogelwch ar gyfer teithwyr," meddai.

"Mae'r ailddatblygiad o orsaf Abertawe wedi dechrau eisoes, gyda gwell cyfleusterau tocynnau a gofod ar gyfer busnes a grwpiau cymunedol.

"Fe fydd yn brofiad llawer, llawer gwell i gwsmeriaid."

Cafodd y £194m ar gyfer gorsafoedd ei addo pan wnaeth Trafnidiaeth Cymru ddechrau rhedeg gwasanaeth Cymru a'r Gororau ym mis Hydref 2018.

Maen nhw'n dweud y bydd pob un o'r 247 o orsafoedd dan eu rheolaeth yn gweld gwelliannau dros y 15 mlynedd nesaf.

Maen nhw'n gobeithio darparu WiFi am ddim, llochesi gwell, teledu cylch cyfyng, a gwella'r ddarpariaeth storio beics a gwybodaeth i deithwyr ym mhob gorsaf.

Mae perchennog Trafnidiaeth Cymru - Keolis Amey - hefyd wedi addo gwario £800m ar drenau newydd a chynyddu nifer y llefydd ar drenau o ddau draean.