91Èȱ¬

Mae eira wedi achosi trafferthion ar draws Cymru am yr ail ddiwrnod yn olynol.

Mae ymhell dros 100 o ysgolion ar gau, gan gynnwys dros 70 yn Sir Y Fflint, ac mae amodau yn anodd i yrwyr.

Mae gweddill y gogledd, rhannau o Bowys a Sir Gaerfyrddin hefyd ymhlith y llefydd sydd wedi eu taro waethaf.

Daeth rhybudd melyn y Swyddfa Dywydd am rew i ben am 11:00 ddydd Mercher, ond mae'r arbenigwyr yn darogan amodau tebyg yn y deuddydd nesaf.

Edrych yn ôl ar drafferthion ben bore Mercher

Roedd disgwyl cawodydd yn ystod y bore, gyda'r posibilrwydd iddi luwchio mewn mannau.

Y cyngor yn gyffredinol yw i bobl ganatáu mwy o amser na'r arfer i deithio ar y ffyrdd a'r rheilffyrdd.

Mae nifer o ffyrdd naill ai ar gau yn rhannol, neu'n destun rhybudd am amodau gyrru anodd neu beryglus.

Cafodd Tîm Achub Mynydd Llanberis eu galw i helpu grŵp o bobl oedd wedi eu dal gan gwymp eira bnawn Mawrth.

Roedd un o ohonyn nhw wedi torri coes yn y cwymp, a bu'n rhaid ei gludo o'r mynydd mewn hofrennydd.

Rhybudd tywydd pellach

Mae'r Swyddfa Dywydd wedi cyhoeddi dau rybudd melyn arall:

Ddydd Mawrth, bu'n rhaid cau Bwlch Sychnant yng Nghonwy, Bwlch yr Oerddrws ger Dolgellau a'r A487 rhwng Machynlleth a thafarn y Cross Foxes.

Bu'n rhaid defnyddio aradr eira ar yr A44 yn ardal Aberystwyth ar ôl i geir fynd yn sownd.

Aeth ceir a lorri yn sownd yn yr eira ar yr A487 hefyd yn ardal Dinas Mawddwy, ac roedd cyngor i osgoi Bwlch y Crimea ym Mlaenau Ffestiniog.