Cryfhau'r Gymraeg ar donfeddi myfyrwyr Prifysgol Caerdydd
- Cyhoeddwyd
Mae'r ddarpariaeth gyfryngol yn y Gymraeg gan fyfyrwyr ym Mhrifysgol Caerdydd wedi bod yn brin iawn - tan nawr.
Er bod yna erthyglau Cymraeg rheolaidd ym mhapur newydd Gair Rhydd a weithiau yng nghylchgrawn Quench, sy'n rhan o ddarpariaeth gyfryngol y brifysgol i fyfyrwyr gan fyfyrwyr, doedd 'na ddim lle i lawer o'r Gymraeg ar orsaf radio Xpress Radio nac ar Cardiff Union TV, sianel deledu Undeb y Myfyrwyr.
Ond, diolch i ymgyrch gan fyfyrwyr sydd wedi ffurfio Cyfryngau Myfyrwyr Cymraeg Caerdydd (CMCC), mae'r ddarpariaeth gyfryngol yn yr iaith yn cynyddu.
O hyn ymlaen bydd chwech awr o raglenni Cymraeg i'w clywed ar nosweithiau Iau a Gwener ar Xpress Radio.
Mae'r arlwy yn cynnwys rhaglenni fydd yn trafod chwaraeon, cerddoriaeth a gwleidyddiaeth.
Am y tro cyntaf hefyd cafodd darllediad byw yn y Gymraeg ei weld yn ddiweddar ar Cardiff Union TV.
Criw o fyfyrwyr Prifysgol Caerdydd yn cynyddu'r ddarpariaeth ar gyfryngau'r myfyrwyr
Un o sylfaenwyr CMCC ydy Aled Huw Russell, myfyriwr ail flwyddyn sy'n astudio Newyddiaduraeth: "Fy ngweledigaeth i yw sicrhau awyrgylch sy'n galluogi i'r Gymraeg ffynnu yn y Brifysgol."
Mae CMCC yn gobeithio y bydd myfyrwyr newydd yn dangos diddordeb yn y cynllun fel y gall y gwasanaethau cyfryngol Cymraeg ym Mhrifysgol Caerdydd gael eu cryfhau ymhellach yn y dyfodol.
Stori: Ifan Jones-Edwards. Mae Ifan yn astudio Newyddiaduraeth ym Mhrifysgol Caedydd