91Èȱ¬

Fe wnaeth amseroedd aros ar gyfer cleifion yn unedau brys Cymru barhau'n wastad fis diwethaf, yn ôl y ffigyrau iechyd diweddaraf.

Maen nhw'n dangos gwelliant mewn amser ymateb ambiwlansys, ond mae GIG Cymru yn parhau ar ei hôl hi ar dargedau aros am driniaeth canser.

Am y tro cyntaf, mae saith casgliad o ffigyrau'r GIG wedi'u rhyddhau ar yr un diwrnod.

Dywedodd Llywodraeth Cymru mai'r nod yw creu darlun mwy clir o'r gwasanaeth iechyd yng Nghymru.

Mae'r ffigyrau diweddaraf yn dangos bod ambiwlansys wedi cyrraedd 77.9% o'r galwadau mwyaf brys o fewn wyth munud, o'i gymharu â'r targed o 65%.

Dyma'r ffigwr gorau i'r gwasanaeth ers mis Tachwedd.

Bu'n rhaid i 3,206 o gleifion ddisgwyl mwy na 12 awr mewn unedau brys ym mis Mawrth, a bu 81% o gleifion yn disgwyl llai na phedair awr - yr un lefel â'r mis blaenorol.

Y targed yw y dylai 95% o gleifion gael eu trin o fewn pedair awr, ac na ddylai unrhyw un ddisgwyl dros 12 awr.

4.5% o gleifion sy'n disgwyl mwy na 36 wythnos am driniaeth ysbyty ar ôl cael eu cyfeirio yno gan feddyg teulu, ac mae'r ffigwr yma wedi parhau i ostwng ers mis Awst 2015.

Mae mwy o bobl hefyd - 86.9% - yn dechrau eu triniaeth o fewn 26 wythnos.

Fe wnaeth 400 o gleifion wynebu oedi yn cael eu symud o'r ysbyty i gam nesaf eu gofal ym mis Mawrth.

530 oedd y ffigwr yma flwyddyn yn ôl, ac mae wedi gostwng yn gyson dros y degawd diwethaf o 650.

Mae nifer y cleifion sy'n disgwyl mwy nag wyth wythnos am ddiagnosis penodol wedi gostwng o dros 9,000 ym mis Ionawr i lai na 7,000 ym mis Chwefror.

Gwelwyd gostyngiad bychan hefyd yn y nifer sy'n disgwyl mwy nag 14 wythnos.

Mae'r ffigyrau yn dangos bod bron i 87% o gleifion wedi dechrau triniaeth o fewn 62 diwrnod, o'i gymharu â'r targed o 95%.

Fe wnaeth 97% o'r cleifion gafodd ddiagnosis o ganser am y tro cyntaf ddechrau eu triniaeth o fewn 31 diwrnod, ychydig yn fyr o'r targed o 98%.