91Èȱ¬

Mae'r cynllun iaith gafodd ei dderbyn gan gyngor llawn Sir Gâr yn un ddylai gael ei efelychu gan siroedd eraill Cymru, meddai mudiad Dyfodol i'r Iaith.

Yr wythnos hon, penderfynodd y sir dderbyn argymhellion adroddiad ar yr iaith Gymraeg.

Casglodd grŵp, gafodd ei benodi er mwyn edrych ar y sefyllfa, fod angen canolbwyntio ymdrechion ar wyth maes penodol er mwyn atal y dirywiad yn nifer y siaradwyr Cymraeg.

Dangosodd Cyfrifiad 2011 bod llai na hanner poblogaeth y sir yn siarad yr iaith, am y tro cyntaf.

Dywedodd Heini Gruffudd, cadeirydd Dyfodol i'r Iaith: "Mae'n gam hanesyddol bod sir yng Nghymru'n derbyn cynllun iaith sy'n cwmpasu tai, yr economi, addysg a'r iaith mewn gwaith ac yn y gymdeithas.

"Mae gan y cynllun iaith a gafodd ei dderbyn y gallu i weddnewid sefyllfa'r Gymraeg yn y sir. Mae'n mynd i'r afael â'r rhan fwyaf o'r agweddau sydd o fewn gallu Cyngor Sir.

"Rydyn ni'n edrych ymlaen at weld yr iaith yn cael ei defnyddio fwyfwy gan weithwyr yn y sir ac at weld y sir yn cynnig gweithgareddau Cymraeg i bobl ifanc."

Roedd Dyfodol i'r Iaith wedi cyflwyno sylwadau i'r gweithgor oedd yn paratoi'r cynllun iaith.

"Mae'n dda gweld bod y cynllun iaith wedi ymateb mor gadarnhaol.

"Ac mae angen i Lywodraeth Cymru'n awr dderbyn y cynllun iaith hwn fel patrwm gweithredu ar gyfer siroedd eraill Cymru.

"Yn y pen draw, defnyddio'r Gymraeg yn y cartref, yn y gymdeithas ac yn y gwaith fydd yn ei diogelu, yn anad dim arall."