91Èȱ¬

Bydd cyfle i bobl fynegi eu barn ar ddyfodol hen gartref Hedd Wyn yr wythnos nesaf, pan fydd ymgynghoriad yn cael ei lansio.

Y llynedd cafodd grant o £149,700 ei roi tuag at gynlluniau i gadw a datblygu'r Ysgwrn, ger Trawsfynydd, fel amgueddfa a chanolfan ddehongli.

Ond roedd angen i Awdurdod Parc Cenedlaethol Eryri benderfynu ar gynlluniau manylach cyn gwneud cais am fwy o gyllid.

Bydd cyfle, fel rhan o'r ymgynghoriad, i weld y cynlluniau gan gwmni Purcell.

Credir fod Yr Ysgwrn yn dyddio'n ôl i 1519.

Roedd yn gartref i'r bardd Ellis Humphrey Evans - Hedd Wyn - a enillodd y Gadair yn Eisteddfod Penbedw yn 1917 am ei awdl, "Yr Arwr".

Ond cafodd ei ladd ym Mrwydr Passchendaele chwe wythnos cyn yr Eisteddfod.

Bydd sesiwn i'r cyhoedd gael gweld y cynlluniau ar gyfer y bwthyn, a chael sgwrs gyda'r penseiri yn Neuadd Trawsfynydd ar nos Fercher, Tachwedd 27.

Yn ôl rheolwr y prosiect, Naomi Jones, mae angen ymgynghori i ddenu cefnogaeth.

"Cyn cyflwyno'r ceisiadau, rydym yn awyddus i ymgynghori â'r rhai sydd â diddordeb a'r sawl fydd yn cael eu heffeithio gan ddatblygiad Yr Ysgwrn, er mwyn sicrhau bod y cynlluniau mor effeithiol â phosib ac er mwyn sicrhau cymaint o gefnogaeth ag y gallwn ni i'r datblygiad," meddai.

"Rhai syniadau sydd gennym, er enghraifft, yw adfer llofftydd a bwtri'r Ysgwrn i'w cyflwr gwreiddiol, gwella mynediad i bobl anabl a defnyddio rhai o adeiladau traddodiadol y safle i ddehongli themâu sy'n gysylltiedig â'r Ysgwrn."