91Èȱ¬

Mae rhai adrannau o Ysbyty Athrofaol Cymru yng Nghaerdydd yn "beryglus", ac mae cleifion yn "marw yn rheolaidd" tra'n aros am lawdriniaethau.

Dyna mae rhai o lawfeddygon yr ysbyty ei hun yn honni, mewn adroddiad ddaeth i law 91Èȱ¬ Cymru.

Ynddo, mae llawfeddygon yn dweud bod cyflwr cleifion yn aml yn gwaethygu, neu pobl hyd yn oed yn marw, tra ar rhestrau aros, a bod dros 2000 o lawdriniaethau wedi eu gohirio mewn cyfnod o dair mis, oherwydd bod adrannau gofal brys methu delio hefo'r holl gleifion sydd angen triniaeth.

Daeth y problemau i'r amlwg yn ystod ymweliad i'r ysbyty gan Goleg Brenhinol y Llawfeddygon (RCS), sydd wedi ysgrifennu at y Gweinidog Iechyd i ddatgan eu pryderon.

Mae Prif Weithredwr Bwrdd Iechyd Prifysgol Caerdydd a'r Fro wedi dweud bod y problemau yn "annerbyniol", ac wedi ymddiheuro i gleifion.

Mae'n dweud bod y problemau wedi eu hachosi gan bwysau "di-ddiwedd" ar wasanaethau gofal brys.

Mae'r adroddiad gan Goleg Brenhinol y Llawfeddygon yn dweud bod "consensws" ymysg meddygon bod gwasanaethau yn yr ysbyty yn "beryglus" ac o "safon isel". Mae'n dweud bod angen i'r bwrdd iechyd roi sylw "fel mater o frys" i fynd i'r afael hefo'r problemau.

Dywedodd yr RCS bod yr ymweliad i'r ysbyty wedi amlygu nifer o broblemau oedd yn "risg sylweddol i gleifion".

Ymysg y cwynion gan feddygon oedd bod cleifion oedd yn aros am driniaeth ar y galon yn dioddef oherwydd rhestrau aros hir.

Cafodd llawdriniaethau ar blant, i dynnu tonsiliau neu rhoi gromedau yn y glust eu gohirio.

Dywed bod adrannau gofal brys yn llawn, gyda chleifion yn cael eu cadw mewn coridorau neu ambiwlansys.

Y gwyn fwyaf oedd bod dros 2000 o lawdriniaethau wedi eu gohirio neu wedi eu canslo yn llwyr oherwydd diffyg gwlau, yn nhri mis cyntaf eleni.

Y brif reswm am hyn yn ôl yr RCS yw "methiant yr ysbyty i reoli mynediadau cleifion brys, ac anallu i ryddhau cleifion yn effeithiol".

'Ffiaidd'

Y llynedd, roedd Susan Watkins o Dredegar yn aros i gael llawdriniaeth ar y galon yn yr ysbyty, dywedodd y meddygon y byddai rhaid iddi aros chwe wythnos.

Chwe mis yn ddiweddarach doedd Ms Watkins dal heb ei thrin, a bu farw ar 12 o Ragfyr, yn 51 oed.

Mae ei merch , Sarah, yn dweud bod y gofal gafodd ei mam yn annerbyniol.

"Mae'n ffiaidd i ddweud y gwir. Mae pobl yn rhoi eu ffydd yn y gwasanaeth iechyd, ac mae pobl yn disgwyl cael gofal o safon."

"Ond y gwir ydy bod pobl yn marw oherwydd diffyg gofal."

Mae Prif Weithredwr Bwrdd Iechyd Prifysgol Caerdydd a'r Fro wedi ymddiheuro, ac mae'n dweud bod gwelliannau yn cael eu gweithredu, i sicrhau nad ydy gofal brys yn effeithio ar lawdriniaeth i gleifion eraill, yn cynnwys plant:

"Rydw i wedi ymddiheuro i'n cleifion. Dyw hwn ddim yn sefyllfa i ni fod yn falch ohono. Mae angen i ni wneud yn well, a'r gwir yw y gallwn, ac y byddwn, yn gwneud hynny," meddai Adam Cairns.

"Rhaid i ni brofi ein bod yn cydnabod bod problemau yn bodoli, ac fe rydym ni, a phrofi bod ein cynllun i ddod i'r afael â'r problemau yn gweithio. Byddwn yn cyhoeddi ein cynllun dros y dyddiau nesaf i'r cyhoedd gael ei weld."

Mae Adam Cairns yn gwadu mai effaith toriadau ariannol sydd wrth wraidd y problemau yn yr ysbyty, wrth i fyrddau iechyd dros Gymru geisio arbed arian:

"Mae pob bwrdd iechyd dan bwysau ariannol, mae hynny'n ffaith. Un o'r honiadau sy'n cael ei wneud yn yr adroddiad yw ein bod ni yn lleihau neu canslo triniaethau i arbed arian. Gallaf ddweud yn bendant nad oedd hynny yn digwydd.

"Cafodd y problemau eu hachosi gan bod gormod o gleifion yn ein system gofal brys, a'n methiant i dderbyn mwy o gleifion oherwydd hynny. Nid oedd y problemau o achos ein sefyllfa ariannol."

Roedd yr RCS wedi ysgrifennu at Lywodraeth Cymru yn dilyn eu hymweliad â Ysbyty Athrofaol Cymru, a dywedodd llefarydd ar ran y llywodraeth bod y gweinidog iechyd wedi cyfarfod hefo'r RCS i drafod:

"Roedd y Gweinidog Iechyd yn pryderu am adroddiad Coleg Brenhinol y Llawfeddygon a'r risgiau i safonau yr oedd yn ei amlygu."

Yn ôl y Llywodraeth mae cynllun gwaith wedi ei ffurfio i ddelio hefo'r pryderon, ac "mae'r gweinidog yn cael ei hysbysu am welliant yn yr ysbyty yn rheolaidd."

Mae'r RCS wedi dweud y byddan nhw yn ymweld â'r ysbyty eto ym mis Medi i adolygu'r sefyllfa:

"Ar hyn o bryd mae hi'n rhy gynnar i ddweud os bydd y cynllun gwaith yn ateb ein pryderon," meddai'r RCS.

"Ond rydym ni wedi cytuno y bydd Bwrdd Materion Proffesiynol yr RCS yn ymweld â Bwrdd Iechyd Prifysgol Caerdydd a'r Fro yn Medi 2013 i asesu'r gwelliant."