Gwyn ein byd
Yn y ddau bapur dyddiol Saesneg ar gyfer Cymru gwelwyd y bore ma atgyfodi'r hen goel ymhlith rhai mai gair Cymraeg oedd 'penguin' yn wreiddiol.
Yr hen stori yw mai llygriad yw'r enw Saesneg ar yr aderyn o'r hyn alwai morwyr o Gymru yr aderyn pan welsant ef gyntaf, "Pen gwyn".
Dydi hi ddim yn ddamcaniaeth newydd a daw i'r fei unwaith eto y bore ma gyda chyhoeddi fersiwn ar-lein newydd o'r Oxford English Dictionary sy'n ailbedlera'r ddamcaniaeth.
A damcaniaeth fath hyfryd ydi hi hefyd ac yn gwneud perffaith synnwyr.
Oni bai am un peth. Pennau duon sydd gan bengwinod - eu brestiau a rhan o'u gwddf sy'n wyn.
Mae'n deg dweud, felly, y byddai'r morwyr chwedlonol hynny o Gymry wedi bod dipyn nes ati pe byddent wedi eu galw'n Fronwennod.
Efallai y dylen nhw fod wedi mynd i Sbecsefyrs.
