91Èȱ¬

Mae Clwb Pêl-droed Wrecsam yn cyhoeddi llyfr stori ddwyieithog i blant ar gyfer Diwrnod Rhyngwladol y Llyfr.

Gobaith y clwb yw bydd y nofel yn ysbrydoli plant i ddarllen yn yr iaith Gymraeg.

Mae 'Y Ddraig Lwcus' wedi ei ysbrydoli gan drigolion a lleoliadau gwahanol yn Wrecsam ac wedi ei anelu at blant 6-10 oed.

Mae'n brosiect ar y cyd rhwng y clwb pêl-droed, eu noddwr technoleg HP ac elusen ryngwladol NABU sy'n ceisio hybu llythrennedd plant mewn ieithoedd brodorol.

Yn ôl y partneriaid, bydd y llyfr yn dathlu cyfoeth diwylliannol ardal Wrecsam yn y gobaith o annog plant ar hyd a lled Cymru i ddarllen.

'Ceisio dathlu'r Gymraeg ar bob cyfle'

Gyda ffigyrau diweddar gan y National Literacy Trust yn dangos bod nifer y plant sy'n mwynhau darllen ar draws y DU ar ei lefel isaf ers 2005, gobaith y clwb yw "ysbrydoli plant i ddarllen trwy'r iaith Gymraeg ond mae o ar gael hefyd i bobl sydd isio dechrau dysgu'r iaith".

Ychwanegodd Siôn Hughes o'r clwb: "'Den ni fel clwb yn ceisio dathlu'r Gymraeg ar bob cyfle.

"Mae HP a NABU wedi dod i fewn ar hynny ac yn frwdfrydig am hynny hefyd."

"Mae'r cyfeiriadau lleol yn greiddiol i'r prosiect."

Ychwanegodd: "Den ni'n sylwi bod clybiau pêl-droed yn ganolog i gymunedau lleol ac maen nhw'n hollbwysig i roi cyfle i bawb ddod at ei gilydd.

"Mae'r stori'n ffocysu ar Wrecsam, ond mae'n un i bawb ledled Cymru uniaethu efo achos dwi'n meddwl bod ni gyd efo'r teimlad yna at ein clybiau lleol."

Adrodd hanes yr ardal leol

Mae'r stori yn adrodd hanes un o gefnogwyr ffuglennol y clwb, Alys, sy'n llwyddo i wynebu ei heriau ar ôl cael tegan meddal draig yn anrheg gan ei thaid.

Mae'r llyfr hefyd yn cyfeirio at leoliad a sefydliadau go iawn yn Wrecsam fel y banc bwyd lleol a hen Orsaf Achub y Glowyr.

Amy Lalanne a'r elusen NABU yw'r awduron, ac mae'r testun wedi ei gyfieithu i'r Gymraeg gan gwmni Cymen.

Yn ôl y partneriaid, mae ymchwil yn awgrymu bod llyfrau mewn mamiaith yn effeithiol iawn wrth annog plant i ddarllen a gwella llythrennedd.

Mae llythrennedd yn gwella sgiliau digidol sydd yn ei dro yn effeithio ar ganlyniadau addysg a chyfleoedd economaidd, medd y partneriaid.

Bydd fersiwn print o'r llyfr ar gael mewn ysgolion lleol a llyfrgelloedd gyda'r elw yn mynd i elusennau lleol.

Bydd fersiwn ddigidol am ddim hefyd.

Bydd gweithgareddau wedi eu hysbrydoli gan y llyfr, megis lluniau i'w lliwio a chreu dreigiau origami hefyd ar gael o wefan HP.