Rydyn ni wedi diweddaru ein Polisi Preifatrwydd a Chwcis
Rydyn ni wedi gwneud newidiadau pwysig i'n Polisi Preifatrwydd a Chwcis ac rydyn ni eisiau i chi wybod beth all hyn ei olygu i chi a'ch data.
Tlws John a Ceridwen Hughes i Sioned Page-Jones
Sioned Page-Jones o bentref Blaen-y-coed, Sir Gâr yw enillydd Tlws John a Ceridwen Hughes Uwchaled eleni.
Fe wnaed y cyhoeddiad gan y gyflwynwraig Heledd Cynwal o flaen neuadd lawn yn Ysgol Bro Myrddin nos Lun.
Wedi ei henwebu gan aelodau Aelwyd Hafodwenog ar ran holl bobl ifanc y sir, cyflwynir y tlws yn flynyddol am gyfraniad sylweddol i fywyd ieuenctid Cymru.
Gyda'i hangerdd am faes y ddawns werin a dawns y glocsen yn cael ei ddisgrifio fel "heintus", mae Sioned wedi hyfforddi degau o grwpiau ac unigolion dawnsio a chlocsio yn enw Aelwyd Hafodwenog, Dawnswyr Talog a Chlocswyr Cowin.
Wedi dechrau ei thaith gydag Aelwyd Hafodwenog yn 19 mlwydd oed, cafodd flas ar hyfforddi yn 1997 wrth baratoi'r Parti Deusain dan 15 ar gyfer Eisteddfod yr Urdd.
Ffynhonnell y llun, Urdd Gobaith Cymru
Daeth llwyddiant mawr i'r aelwyd y flwyddyn honno - cafodd y parti drydydd yn y gystadleuaeth a daliodd Sioned y 'bug cystadlu', profiad sydd wedi cefnogi sawl cenhedlaeth ar hyd y sir ers hynny.
Daeth Sioned yn arweinydd Clwb Ffermwyr Ifanc Penybont pan ail-sefydlwyd y Clwb 2004 gan sefydlu Côr Cymysg am y tro gyntaf yn ei hanes.
18 mlynedd yn ddiweddarach mae dal wrth y llyw ac wedi hyfforddi ac arwain y Côr Cymysg i lwyddiannau mawr ar lwyfannau Eisteddfod CFfI Cymru.
'Cynnig cyfleoedd amhrisiadwy'
Dywedodd Siân Eirian, Cyfarwyddwr Eisteddfod yr Urdd: "Ar ran yr Urdd hoffwn longyfarch Sioned Page-Jones ar ennill Tlws John a Ceridwen Hughes Uwchaled 2023.
"Mae Sioned wedi cefnogi a chynnig cyfleoedd amhrisiadwy i blant a phobl ifanc Sir Gar ers dros chwarter canrif, a bydd hi'n fraint a phleser ei hanrhydeddu yn yr Eisteddfod eleni yn Sir Gaerfyrddin.
"Mae'r Urdd yn ddibynnol ar bobl weithgar, cydwybodol fel hyn i'w gynnal a'i hyrwyddo a dangos pa mor werthfawr, a gymaint o hwyl, ydi bod yn aelod o'r mudiad."
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.
Diwedd neges Twitter
Caiff Tlws John a Ceridwen Hughes Uwchaled ei roi gan Dewi a Gerallt Hughes, er cof am eu rhieni John a Ceridwen Hughes oedd yn weithgar ym maes ieuenctid.
Bydd seremoni arbennig i gyflwyno'r tlws ar Lwyfan y Cyfrwy ddydd Iau, 1 Mehefin ar faes Eisteddfod yr Urdd Sir Gaerfyrddin.
