Rydyn ni wedi diweddaru ein Polisi Preifatrwydd a Chwcis
Rydyn ni wedi gwneud newidiadau pwysig i'n Polisi Preifatrwydd a Chwcis ac rydyn ni eisiau i chi wybod beth all hyn ei olygu i chi a'ch data.
Cwestiwn ac ateb: Sut alla i gael trydydd brechlyn?
Ffynhonnell y llun, Getty Images
Mae gwyddonwyr yn dweud fod trydydd brechiad yn hollbwysig yn y frwydr yn erbyn yr amrywiolyn Covid-19 diweddaraf.
Mae 15 o achosion Omicron wedi eu cofnodi yng Nghymru ac fe ddaeth i'r amlwg bore Llun bod un person eisoes yn yr ysbyty gyda'r haint.
Sut mae mynd ati i gael y brechlyn atgyfnerthu, neu'r 'booster'?
Yr ateb gan Lywodraeth Cymru, yn syml, ydy "arhoswch i gael eich gwahodd".
Bydd eich bwrdd iechyd yn cysylltu â chi pan ddaw eich tro.
Maen nhw'n cael eu rhoi yn nhrefn grwpiau oedran, gan roi blaenoriaeth i frechu oedolion hÅ·n a phobl sydd mewn mwy o berygl.
Peidiwch â chysylltu â'ch meddyg teulu i ofyn am apwyntiad - dyma'r neges gan Lywodraeth Cymru.
Ond fe fydd mwy o ganolfannau brechu yn agor, gydag opsiynau cerdded i mewn a gyrru drwodd, ac oriau agor hirach.
Yn gynharach yn y mis, fe lwyddodd un ganolfan yn Nefyn i frechu bron i 4,000 o bobl mewn un penwythnos.
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.
Diwedd neges Twitter, 1
Fydda i'n cael trydydd brechiad?
Ers diwedd Tachwedd, mae pob oedolyn dros 18 oed yn gymwys am drydydd brechiad.
Y cyngor meddygol o hyd ydy i beidio brechu plant dan 12 oed.
Pryd?
Bellach, dim ond tri mis o ofod sy'n rhaid wedi bod ers i chi dderbyn eich ail ddos o'r brechlyn.
Mae hyn wedi newid o'r cyngor blaenorol, sef chwe mis.
Dywedodd y Prif Weinidog Mark Drakeford fod Llywodraeth Cymru yn gwneud "popeth o fewn ein gallu i gyflymu ein rhaglen frechu", a dyna'r neges gan sawl bwrdd iechyd hefyd.
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.
Diwedd neges Twitter, 2
Pa mor effeithiol ydy trydydd brechiad?
Er bod brechlynnau Covid yn cynnig llai o warchodaeth rhag salwch yn achos Omicron, mae data cynnar yn awgrymu fod trydydd brechlyn yn rhoi tua 70% i 75% o amddiffyniad yn erbyn haint symptomatig.
Mae'r Cyd-bwyllgor Imiwneiddio a Brechu (JCVI) wedi argymell defnyddio'r brechlyn Pfizer-BioNTech a'r brechlyn Moderna ar gyfer y rhaglen brechiadau atgyfnerthu.
Y rhain sy'n cynnig yr amddiffyniad gorau fel trydydd dos.
Oes yna ddyddiad targed?
Mae yna gynlluniau i geisio cynnig brechlyn atgyfnerthu i bob oedolyn yng Nghymru erbyn diwedd Rhagfyr yn lle diwedd Ionawr.
Ond yn wahanol i Loegr, dywedodd y Gweinidog Iechyd, Eluned Morgan nad oedd am wneud addewidion "tan ein bod ni yn hollol siŵr ein bod ni yn gallu cadw atyn nhw".
Roedd gan Gymru gynllun eisoes i roi brechlyn atgyfnerthu i 1.3 miliwn o bobl cyn diwedd Ionawr.
Ar hyn o bryd mae'r rhaglen yng Nghymru yn dal i alw pobl, mewn trefn, am apwyntiadau sydd chwe mis o'u hail ddos, ac mae Cymru bellach wedi cyrraedd 80% o'r rheini.
Faint o bob sydd wedi cael tri brechlyn?
Mae 51% o bobl sydd bellach yn gymwys wedi derbyn trydydd dos yng Nghymru.
Mae hyn yn cymharu â 56% yn Yr Alban, 53% yn Lloegr a 45% yng Ngogledd Iwerddon.
Roedd 91% o'r brechlynnau a roddwyd yn ystod yr wythnos ddiweddaraf yng Nghymru yn rhai trydydd dos.
Ar gyfartaledd mae tua 18,200 o bigiadau atgyfnerthu yn cael eu rhoi y dydd.
Ar anterth y rhaglen frechu ym mis Mawrth eleni, roedd y ffigwr yna tua 38,000-40,000 y dydd.
