Ailagor ffatri brechlyn ar 么l canfod 'pecyn amheus'

Ffynhonnell y llun, Mark Evans

Mae uned ddifa bomiau wedi ymateb i ddigwyddiad yn agos i ffatri yn Wrecsam sy'n cynhyrchu'r brechlyn AstraZeneca ar gyfer coronafeirws.

Cafodd y gwasanaethau brys eu galw i adroddiadau o becyn amheus ar Stad Ddiwydiannol Wrecsam fore Mercher, ger ffatri Wockhardt UK.

Cafodd ffyrdd eu cau yn yr ardal a gweithwyr eu symud o'r ffatri wrth i'r heddlu a'r uned ddifa bomiau ymateb.

Cadarnhaodd y cwmni brynhawn Mercher bod y gwaith o gynhyrchu'r brechlyn wedi ei atal am gyfnod, ond bod staff bellach wedi cael mynd yn 么l i'r adeilad.

Ni fydd yr oedi yn effeithio ar yr amserlen gynhyrchu, meddai Wockhardt.

Yn gynharach, dywedodd Wockhardt bod "pecyn amheus" wedi cyrraedd y safle, ac ar gyngor arbenigol cafodd y ffatri ei gwagio'n rhannol.

Dywedodd y Weinyddiaeth Amddiffyn bod uned ddifa bomiau wedi bod ar y safle, a bydd y pecyn yn cael ei archwilio fel rhan o ymchwiliad Heddlu Gogledd Cymru.

Does dim adroddiadau o unrhyw anafiadau.

Mae'r rhan fwyaf o'r ffyrdd wedi agor i'r cyhoedd eto, ond dywedodd yr heddlu y byddai rhai cyfyngiadau'n parhau.

Dywedodd Heddlu'r Gogledd: "Does dim pryderon pellach am ddiogelwch y cyhoedd, ond fe fydd rhai ffyrdd ar y stad ddiwydiannol yn parhau ynghau wrth i'r ymchwiliad barhau."