91Èȱ¬

Mae'r Gweinidog Iechyd, Vaughan Gething wedi mynnu bod Cymru'n gweithio "mor gyflym â phosib" ar ei chynllun brechu er mwyn amddiffyn pobl rhag Covid-19.

Dywedodd bod "datblygiadau sylweddol" yn digwydd o ran darparu'r brechlynnau, ac na fydd y gwasanaeth iechyd yn methu'r cyhoedd.

Daw ei sylwadau ar ôl i'r Prif Weinidog, Mark Drakeford ddenu beirniadaeth am ddweud bod y brechlyn Pfizer yn cael ei oedi am y tro gan fod yn rhaid i gyflenwad Cymru bara tan fis Chwefror.

Dywedodd Llywodraeth Cymru wedi hynny mai'r rheswm dros oedi dosbarthu'r brechlyn ydy nad ydyn nhw eisiau ei wastraffu trwy yrru mwy o ddosau na'r hyn y mae'r byrddau iechyd yn gallu eu defnyddio.

Daw ei sylwadau wrth i Iechyd Cyhoeddus Cymru gadarnhau 1,106 o achosion newydd o Covid-19 yng Nghymru dros y 24 awr diwethaf, gan fynd â chyfanswm yr achosion i 182,599 ers dechrau'r pandemig.

Cafodd wyth yn rhagor o farwolaethau eu cofnodi gan ICC. Mae 4,302 bellach wedi marw gyda'r haint yng Nghymru.

Bellach mae 161,932 o unigolion wedi derbyn un dos o frechlyn yng Nghymru, a 265 wedi derbyn ail ddos.

'Cynnydd da'

Dywedodd Mr Gething ar Radio Wales fore Mawrth: "Pob wythnos mae cam mawr ymlaen o ran darparu'r brechlynnau.

Ychwanegodd bod Mr Drakeford wedi egluro bellach "nad ydyn ni'n dal brechlynnau yn ôl".

"Rydyn ni'n mynd mor gyflym â phosib," meddai.

"Mae mwy a mwy o bobl yn cael eu hamddiffyn ac erbyn diwedd yr wythnos hon fe ddylai saith o bob 10 o breswylwyr a staff cartrefi gofal fod wedi ei gael, ac fe ddylai saith o bob 10 person dros 80 oed fod wedi ei dderbyn hefyd.

"Rydyn ni'n gwneud cynnydd da o ran cyflymu pethau. Ras yn erbyn y feirws ydy hwn er mwyn adfer cymaint o'n bywydau arferol â phosib.

Ond dywedodd llefarydd iechyd y Ceidwadwyr Cymreig, Andrew RT Davies nad ydy Llywodraeth Cymru'n darparu'r brechlynnau mor gyflym â phosib.

"Dyw'r brechlyn yn dda i ddim yn y botel - fe ddylwn ni fod yn ei ddefnyddio cyn gynted â phosib," meddai.

"Mae gennym rannau enfawr o'r economi ar gau, ac argyfwng iechyd cyhoeddus ar draws y wlad.

"Sbrint ydy hi i gael y brechlyn i bobl mor gyflym â phosib er mwyn amddiffyn pobl yn erbyn y feirws."

'Diffyg eglurder yn achosi dryswch'

Ychwanegodd llefarydd iechyd Plaid Cymru, Rhun ap Iorwerth ei bod yn allweddol fod gan y cyhoedd hyder yn y ffordd mae'r system yn gweithio.

"Tra bod pobl yn eistedd adref yn disgwyl eu twrn, mae angen iddyn nhw deimlo y bydd eu cyfle nhw yn dod mewn da bryd," meddai.

"'Da ni wedi cael cyfres o ergydion i hyder pobl oherwydd y ffigyrau sydd wedi dangos bod llawer mwy o frechlynnau wedi cael eu gyrru i Gymru na'r hyn sydd wedi'i roi i bobl.

"Yna rydyn ni'n cael y cwpl o ddyddiau ble mae'r Prif Weinidog yn dweud yn bendant bod brechlynnau'n cael eu dal yn ôl, ac yna ymhen ychydig oriau 'na, dydyn ni ddim yn dal y brechlyn yn ôl.

"Mae'r diffyg eglurder yma yn arwain at ddryswch."