91Èȱ¬

Mae rhai o'r Cymry sy'n byw yn ninas Melbourne, Awstralia, wedi bod yn sôn am y sefyllfa yno yn dilyn cynnydd sylweddol yn nifer yr achosion coronafeirws yn ddiweddar.

Cyhoeddodd llywodraeth Awstralia stad o drychineb (State of Disaster) ddydd Sul, a bellach mae'r ddinas a thalaith Victoria o dan gyfyngiadau llym i geisio atal yr haint.

Roedd Awstralia wedi bod yn weddol llwyddiannus wrth ddelio efo'r don gyntaf o Covid-19, ond mae rhai yn credu fod y rheolau wedi cael eu llacio'n rhy gyflym, ac mai dyna yw'r rheswm bod mwy o achosion.

Mae Huw Taylor, sy'n wreiddiol o Langefni, yn beiriannydd sifil ac yn byw ym Melbourne, ail ddinas fwyaf Awstralia.

Llacio rheolau'n rhy fuan

Dywedodd fod nifer o bobl wedi rhagweld y byddai'r sefyllfa'n gwaethygu wrth i'r rheolau gael eu codi.

"Y teimlad gan bawb oedd eu bod nhw wedi ymlacio pethau'n rhy fuan, ac y dylsan nhw fod wedi pwyso'r pause button a dal yn ôl am 'chydig."

Mae'r sefyllfa'n straen ar lawer o bobl yn ariannol a meddyliol, meddai.

"Mae ffrind i mi'n gwnselydd, ac mae'n dweud eu bod nhw'n inundated efo pobl efo problemau iechyd meddwl," dywedodd.

Mae gan Huw a'i wraig, Michelle, dri o fechgyn - efeilliaid sy'n 10 oed, a'u brawd hÅ·n sy'n 14. Mae'n dweud fod ceisio dysgu'r hogiau adref wedi bod yn dipyn o her.

"Dwi ddim wedi gweithio ers dechrau'r flwyddyn, a dwi ddim yn entitled i ddim pres gan y llywodraeth, ond dwi'n lwcus bod Michelle yn gallu gweithio o adref, tra dwi'n edrych ar ôl yr hogia."

Dywedodd fod nifer o gynlluniau adeiladu mawr yn mynd ymlaen yn y ddinas ar hyn o bryd, ond roedd y cyfan wedi gorfod dod i stop am y tro, gyda dim ond criwiau cynnal a chadw yn gweithio ar y safleoedd.

"Mae'r recession yn mynd i hitio ni'n galed, ac mi fydd yn cymryd amser hir i gwmnïau gael eu hyder yn ôl.

"Dwi ddim yn gweld pethau'n newid yr ochr yma i 'Dolig, ond mae'n rhaid i ni jest cario mlaen."

Dal i godi

Ers mis Mehefin mae'r haint wedi ffrwydro ym Melbourne, ac mae rhai yn beio methiant i reoli cwarantin ymysg ymwelwyr o dramor oedd yn aros mewn gwestai.

Dair wythnos yn ôl cyhoeddwyd y byddai cyfnod clo chwe wythnos yn cael ei gyflwyno yn y ddinas.

Ond hanner ffordd drwyddo mae cannoedd o achosion yn dal i godi bob dydd yn nhalaith Victoria.

Yn ôl y ffigyrau diweddaraf (23 i 29 Gorffennaf) roedd dros 2,500 achos newydd o Covid-19 - o'i gymharu â 2,200 yr wythnos cynt.

Panic yn y siopau

Dywedodd Aled Roberts - sy'n ymgynghorydd busnes ac yn byw yn Awstralia ers 1998 - fod pobl wedi dechrau mynd i banig yn dilyn y cyhoeddiad ddydd Sul.

"Roedd hi'n banic yn y siopau ddoe - dim cig, y meysydd parcio yn llawn a'r silffoedd yn wag," meddai.

"Mae'r curfew o 20:00 hyd 05:00 yn golygu dim dro hefo'r ci yn hwyr yn y nos. 'Da ni'n byw mewn ardal eithaf gwledig felly mae'r ffyrdd yn hollol wag ar ôl iddi dywyllu. Ond mae'r siopau takeaway yn brysur.

"Mae strydoedd canol Melbourne yn wag, a pawb yn eithaf digalon ar un llaw, ond mae sôn am lefel uwch o gyfyngiadau ers sawl wythnos a meddygon wedi bod yn galw amdano, felly mae rhai yn dweud 'o'r diwedd'.

"Yn ôl be dwi'n ddallt mae'r cyfyngiadau yma yn debyg i be gaeth Cymru pedwar mis yn ôl. Daeth Cymru allan yr ochr arall - gobaith i ni felly!"