91Èȱ¬

Mae Aelodau Seneddol wedi cefnogi mesur i atal Brexit heb gytundeb, ond gwrthod cynnig gan y prif weinidog am etholiad cyffredinol.

Fe wnaeth ASau'r gwrthbleidiau a gwrthryfelwyr Ceidwadol sicrhau bod y mesur ar Brexit yn pasio yn NhÅ·'r Cyffredin gyda mwyafrif o 28.

Mae'r mesur yn gorfodi'r prif weinidog i ofyn am estyniad cyn Brexit os nad oes cytundeb rhwng y llywodraeth a'r Undeb Ewropeaidd. Mae'r mesur yn symud ymlaen i DÅ·'r Arglwyddi nesaf.

Yn syth wedyn dywedodd Boris Johnson mai etholiad cyffredinol oedd yr "unig ffordd ymlaen", ond ni wnaeth digon o ASau ei gefnogi i alw etholiad.

Roedd Mr Johnson eisiau cynnal etholiad cyffredinol ar 15 Hydref.

Er bod 298 wedi cefnogi etholiad, a 56 wedi pleidleisio yn erbyn, nid oedd yn ddigon oherwydd bod angen cefnogaeth dwy ran o dair o Aelodau Seneddol.

Cyn y bleidlais, dywedodd llefarydd Llafur ar Brexit, Syr Keir Starmer, wrth ASau ei blaid na fyddai'n cefnogi etholiad tan fod estyniad i gyfnod Brexit wedi ei gytuno gyda'r UE.

Fe wnaeth Arweinydd Llafur, Jeremy Corbyn, ategu'r farn honno yn NhÅ·'r Cyffredin.

Dywedodd arweinydd seneddol Plaid Cymru, Liz Saville Roberts na fyddai etholiad cyffredinol yn datrys yr "argyfwng sy'n wynebu pedair gwlad y DU" ac felly na fyddai ei phlaid yn pleidleisio dros un.

Mae'r Democratiaid Rhyddfrydol hefyd wedi dweud na fyddan nhw'n cefnogi etholiad ar hyn o bryd.

Dywedodd AS y blaid, Jane Dodds: "Os wnaeth bobl bleidleisio i aros neu adael, wnaethon nhw ddim pleidleisio dros Brexit di-gytundeb fyddai'n eu gwneud yn dlotach."

'Synnwyr cyffredin'

Ond dywedodd Ysgrifennydd Cymru, Alun Cairns, cyn pleidleisiau nos Fercher ei fod "yn optimistig o hyd" y bydd ASau yn "gweld synnwyr cyffredin yn y pen draw" ac yn cefnogi llywodraeth Mr Johnson.

"Ma' 'na gobe'th, ma' 'na hyder, ma' 'na gwaith caled yn mynd ymlaen gan y llywodraeth a gan arweinyddion gwledydd Ewrop fel Angela Merkel, fel bo' ni 'di gweld gan y Taioiseach," meddai, "so 'dwi'n gobeithio o hyd mi fydd pobl yn gweld synnwyr cyffredin yn y pen draw ac yn gweithio tuag at yr addewid bod Cymru wedi pleidleisio i adael yr Undeb Ewropeaidd."

Fe wnaeth gwelliant gan AS Llafur Aberafan, Stephen Kinnock - yn golygu y gallai fersiwn o gytundeb Theresa May ddod gerbron TÅ·'r Cyffredin - basio gyda'r mesur Brexit, er nad oedd pleidlais.

Nid yw'n glir pam oherwydd bod disgwyl i aelodau Llafur a'r Ceidwadwyr bleidleisio yn erbyn, ond ni chafodd adroddwyr eu cynnig yn y siambr.

Dywedodd Mr Kinnock mai bwriad y gwelliant oedd sicrhau nad oedd yr estyniad i broses Brexit yn ddi-werth.