Brexit 'mewn perygl o droi'n drasiedi cenedlaethol'

Disgrifiad o'r llun, Prif Weinidog y Deyrnas Unedig, Theresa May yn siarad ddydd Gwener

Mae Brexit mewn perygl o droi'n "drasiedi cenedlaethol", yn ôl Prif Weinidog Cymru, wedi i Fesur Ymadael yr Undeb Ewropeaidd gael ei drechu yn Nhŷ'r Cyffredin am y trydydd tro.

Roedd maint y golled yn agosach na'r ddwy bleidlais flaenorol - 286 o blaid a 344 yn erbyn - mwyafrif o 58.

Pleidleisio ar y cytundeb yn unig oedd yr aelodau - yn hytrach na'r mesur cyfan oedd yn cynnwys y datganiad gwleidyddol - ac felly fe fyddai angen pleidlais arall ar y mesur cyflawn.

Mae'r golled yn golygu y bydd dyddiad gadael yr UE yn digwydd ar 12 Ebrill fel mae pethau'n sefyll, a hynny heb gytundeb.

Pe byddai'r llywodraeth wedi ennill y bleidlais, fe fyddai'r dyddiad hwnnw wedi ei ymestyn hyd 22 Mai.

Roedd Prif Weinidog Cymru, Mark Drakeford, yn rhoi'r bai am y cyfan ar ysgwyddau Theresa May am y "ffars... sydd mewn perygl o droi'n drasiedi genedlaethol".

Ychwanegodd: "Rhaid i ASau roi'r wlad yn gyntaf a dod o hyd i gyfaddawd a all sicrhau mwyafrif yn Nhŷ'r Cyffredin. Os bydd hyn yn methu, yr unig ffordd ymlaen yw rhoi'r penderfyniad yn ôl yn nwylo'r bobl drwy bleidlais gyhoeddus."

I osgoi neges Twitter, 1
Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.

Gallai hysbysebion ymddangos yng nghynnwys

Diwedd neges Twitter, 1

Mae disgwyl i'r llywodraeth gyhoeddi beth fydd y camau nesaf yn y broses maes o law, ond mae'r golled yma yn golygu nad yw'r sefyllfa ddim cliriach.

Wrth i gyhoeddiad y bleidlais gael ei gyhoeddi fe wnaeth Llywydd Cyngor Ewrop, Donald Tusk, drydar ei fod wedi galw cyfarfod o'r Cyngor ar 10 Ebrill - dau ddiwrnod cyn y dyddiad ymadael newydd.

I osgoi neges Twitter, 2
Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.

Gallai hysbysebion ymddangos yng nghynnwys

Diwedd neges Twitter, 2

Cyn hynny mae disgwyl diwrnod arall o bleidleisiau yn San Steffan ddydd Llun lle bydd cyfle i aelodau gynnig trefniadau amgen allai arwain at gytundeb yn y senedd.

Dyma'r broses ddigwyddodd ddydd Mercher, ond yr adeg hynny ni chafodd yr un o'r cynigion fwyafrif ymysg ASau.

Newid meddyliau

Yn ystod y ddadl fore Gwener, fe wnaeth sawl AS ddatgan eu bod am newid eu pleidlais o'r ddwy bleidlais gyntaf ar y mater.

Disgrifiad o'r llun, Liz Saville Roberts AS

Dywedodd arweinydd Plaid Cymru yn San Steffan, Liz Saville Roberts fod cynnig y bleidlais yn weithred "dwyllodrus gan lywodraeth mewn anobaith".

Ychwanegodd: "Dewch â Phleidlais y Bobl i ni - ein hachubiaeth mewn democratiaeth gyhoeddus."

Ond yn allweddol i'r bleidlais oedd datganiad plaid unoliaethol y DUP o Ogledd Iwerddon. Fe ddywedon nhw yn y senedd na fydden nhw'n cefnogi'r llywodraeth.

Gyda'r nifer o ASau Ceidwadol oedd yn dal yn benderfynol o wrthwynebu cytundeb Theresa May, roedd y cytundeb wedi'i drechu.