Chware'n troi'n chwerw
Bydd yna rai cyfnodau'n dod pan gawn ein boddi gan chwaraeon. A dyma ni y dyddiau hyn yn ei chanol hi.
Mae yna dorfeydd yng Nghasnewydd na welodd Daniel Rowland Llangeitho erioed eu tebyg. A phan oedd y glaw yn golchi'r golffwyr i mewn am loches, roeddech chi'n gwibio draw i Delhi i weld yr agoriad drudfawr, a gyda hyn, y rhedeg a'r neidio.
Hollol ddealladwy. Mae rhedeg a phrancio yn ymarfer bendigedig i gorff ar ei brifiant ac mae cystadlu yn rhoi awch ar y meddwl ifanc. Mae'n hyfforddiant ar gyfer bywyd. Ac un o bleserau'r wythnos i fi bellach yw hebrwng yr wyrion i bwll nofio a chaeau rygbi.
Yn y cartre
Ond arhoswch chi am eiliad. Pan ddon nhw gartre i'r t欧 fe fydda i yn eu gwylio nhw wedi eu hoelio wrth sgrin teledu a sgrin cyfrifiadur yn chwarae gemau trais a lladd.
Gofynnais iddyn nhw unwaith a oedd yna gemau i'w cael lle roedd pobol yn gyfeillion i'w gilydd ac yn garedig at bawb ac fe edrychon nhw arna i gyda thosturi, mod i'n ddigon twp i ddychmygu'r fath beth.
Ac fe wylian nhw am oriau ryw fodau arallfydol yn bygwth a saethu.
Beth bynnag am eu gemau nhw tu fas i'r t欧, dyma eu gemau nhw tu fewn. Os paratoad ar gyfer bywyd yw chwaraeon, disgwyliwch armagedon yn y dyfodol agos, oherwydd bydd gennym lywodraethwyr fydd wedi ymborthi ar drais.
Yma'n barod
Yn wir mae cynnyrch y ffilmiau rhyfel gyda ni'n barod. Mae gyda ni nawr wleidyddion yn eu hoed a'u hamser yn gwario miliynau ar arfau lladd ac yn mynnu na ddylid cwtogi dim ar erchyllterau ffantas茂ol fel Trident.
Mae'r Sais yn hoffi honni i frwydr Waterloo gael ei hennill ar gaeau ysgol Eton. Wel, fe fydd trais a lladd y dyfodol wedi eu geni yn stafelloedd teledu ein plant a'n hwyrion ni.
