 |
|
Popeth
yn flewog neu'n sleimi
Cyfrol o gerddi boncyrs o brysur i blant gan Mihangel Morgan
Dydd Iau, Hydref 25, 2001
|
Creision Hud gan Mihangel Morgan. Y Lolfa. £3.95.
Adolygiad Elen Rhys
Ry’m yn dod i ddisgwyl yr annisgwyl yng ngwaith Mihangel Morgan
a dyw’r gyfrol hon ddim yn eithriad.
Dychymyg byw a ffraethineb
Er nad ydym yn gyfarwydd â Mihangel fel awdur i blant, mae ei ddychymyg
byw a’i ffraethineb ffres yn ddelfrydol ar gyfer y cyfrwng hwn.
Mae byd y Creision Hud yn un gwallgo a gwirion.
Mae popeth yn odli a phob dim un ai’n flewog neu’n sleimi. Dyma gyfrol
llawn o luniau digri, geiriau rhyfedd a chreaduriaid anhygoel. Gwyliwch
eich clustiau, dyma un ar bymtheg o gerddi llawn SNAP, CRACL a PHOP!
Wedi colli’ch hosan, eich allweddi neu’r ‘betingalw’ sy’n newid rhaglenni?
Gwyliwch ‘ych hun - y Fflwmbiau sydd ar fai. Pwy? Wel, creaduriaid
bach blewog, ysgafndroed a chwim sy’n cymryd bob dim sy’n mynd ar
goll!
‘ Fflwmiau bach sy’n b’yta’n sanau
Yn dwyn un o bob maneg
Ac yn cuddio stampiau......
Byw lan lofft
A phwy sy’n byw yn eich atig lan lofft? Neb llai na Hwmffra’r Hwmffragwmffa.
Creadur chwe choes, gyda llais gwichlyd a dwylo fel toes.
Mae Hwmffra’r Hwmffragwmffa
Yn byw lan lofft
Mae’i olwg yn wyllt
Ond mae’i flew yn sofft.....
...Ac fel pob Hwmffragwmffa
Nid yw Hwmffra’n fawr
Ffordd lan mae’n ddewr
Ac yn drist wrth ddod lawr.
Oes, mae gan pob Hwmffragwmffa ffrindiau - y Crilion (
cochion, cneifion, creifion, crop) , yr Ychafil ( nid yw’n
licio’r t’wllwch, nid yw’n licio moch, nid yw’n licio golau dydd na’r
lliwiau glas a choch) , y Crafangafangeiddiwr (bwystfil eitha’
sionc sy’n bwyta bechgyn ysgol ac yn cerdded linc-di-lonc) , y Gwibwe
Ofnus (sy’n gorwedd yn ei wely ym meddwl am bopeth gall fynd o’i
le), y Chwyrngrilyn ( di-drwyn ond chwyrnwr heb ei ail), y
Chwilbat a llawer mwy.
Dewis y chwilbat
Ond petawn i yn gorfod bod yn ffrind i un o’r gwallgoenfilod yma,
b’aswn i a fy nith fach yn ddi-os yn dewis Y Chwlibat:
O, Chwlibat, Chwlibat, Chwlibat chwap
Ble mae dy gynffon a ble mae dy gap?
" Mae fy nghap ar fy nhrwyn lle dylsai fe fod
A’m cynffon mewn siwtces - ‘co, dyma fe’n dod"
Ydy, mae’r Chwlibat yn siarad llawer iawn o sens. A dweud y gwir,
mae’r creaduriaid ‘ma i gyd yn siarad sens - wel, mwy o sens na chi
neu fi!
Ac os ydych chi’n ddigon dewr, mi allwch chi gyd ddysgu dipyn gan
y cyfeillion clyfar yma!!
Felly llyfwch y llyfr, sglaffiwch y synau a bwytewch y bwystfilod!
Cyfrol flasus sy’n boncyrs o brysur!! Tonic o chwerthin am £3.95!
|
|
|
Gair
am air
Siart
Cymru
Llyfrau
ar y We
Nôl
i'r archif
