 |
|
Ar
drywydd llofruddion
Datgelu'r gwir am bedwar achos o farwolaeth amheus
Dydd Iau, Mawrth 22, 2001
|
• Gwenwyn yn y Gwaed gan Roy Davies.
Cyfres Dal y Gannwyll. Golygydd Lyn Ebenezer. Gwasg Carreg Gwalch.
£3.99.
Adolygiad gan Ben Thomas
Pedwar achos o farwolaeth amheus a geir yn y gyfrol fach hon. Achosion
a gofnodir yn drylwyr ac yn drefnus, fel y bydde disgwyl i unrhyw
gyn-dditectif ei wneud.
Ffaeleddau ddoe a heddiw
Yn Gwenwyn yn y Gwaed mae Roy Davies yn llwyddo i adrodd yr
hanesion yn gryno, ond gyda digon o fanylder wrth bortreadu ei brif
gymeriadau fel ei fod yn ennyn awydd yn y darllenwr i ddod i wybod
am eu tynged.
Mae tri o’r pedwar hanes yn perthyn i oes a fu; yng Nghymru’r 1920au,
ond buan iawn y daw hi’n amlwg mai yr un oedd ffaeleddau pobl yr adeg
honno â ninnau heddiw.
Tuedd dreisgar yw gwendid Griffith Jenkins yn y stori gyntaf, Ar
Wely Angau, a’i wraig druan, Mary, sy’n dod yn destun ‘trancedig’
yr hanes.
(Mae hi werth nodi yn y fan hon fod arddull ysgrifennu Roy Davies,
o’i hanfod, yn dechnegol ar adegau, ond mae geiriau pwysig yr olwg
fel trengholiad a madruddyn yn ychwanegu at naws ddifrifol
yr hanesion.)
Smygu pibell a chadw ieir
Cychwyn yr ail stori, Hen Dwrne Bach Cydweli, gyda digwyddiad
digon annymunol, sef datgladdiad truain yr hanes yma.
Gwraig i Harold Greenwood oedd Mabel ac mae’r disgrifiad sy’n cael
ei roi o’r gwr drwgdybus yn un sydd werth ei ddyfynnu:
‘Dyn byr o gorffolaeth oedd Harold Greenwood, bob amser yn drwsiadus,
a chanddo fwstas yn britho, aeliau trwchus, a golwg effro a chraff
bob amser. Arferai grychu ei fwstasen yn aml, arwydd o falchder mae’n
siwr. Ysmygai bibell a chadwai ieir.’
Rhy hawdd proffwydo
Yn Y Corff yn y Gasgen mae’r dystiolaeth yn erbyn Henry Davies
mor dyngedfennol nes bod canlyniad ei achos llys yn un sydd bron â
bod yn rhy hawdd ei broffwydo.
Atyniad yr hanes yma, fodd bynnag, ydy gweld sut mae’n mynd ati i
geisio egluro ymaith yr holl ffeithiau sy’n ei gondemnio ar ôl darganfod
corff ei wraig â’i phen i lawr mewn casgen fawr o ddwr.
Stori ola’r gyfrol yw’r unig un lled-hunangofiannol ar ran yr awdur.
Fe gafodd Amanda Randall ei lladd ym 1978, ac mae hanes llofrudd merch
pedair-ar-ddeg oed mewn cyfnod gweddol diweddar yn gwneud Y Gwr
â Surodd y Gwin yn stori fwyaf byw y llyfr.
Cofio datblygiad erchyll
Fe fydd nifer o ddarllenwyr ardal Llanelli yn siwr o gofio’r digwyddiad
erchyll hwn, ond difyr yw gweld y datblygiadau gwyddonol sy’n helpu
i adeiladu achos yn erbyn Graham Bowen, a chael hynny o safbwynt y
gyfraith.
Nid llyfr yn null Agatha Christie neu Sherlock Holmes yw Gwenyn
yn y Gwaed.
Ffeithiol a phwyllog yw’r hanesion yn hytrach na’u bod yn llawn tensiwn
a chyffro.
Serch hynny, mae pob stori yn unigryw a difyr, a gyda phrin cant o
dudalennau mae’r gyfrol yma yn un wnaiff diddanu unrhyw un sy’n ymddiddori
mewn gweld cyfiawnder yn cael ei gloriannu.
• Beth yw eich barn chi am y llyfr hwn?
Ebostiwch i ddweud
|
|
|
Gair
am air
Siart
Cymru
Llyfrau
ar y We
Nôl
i'r archif
