Proffwyd y Bont
Wrth gwblhau brawddegau mewn rhifyn diweddar o'r cylchgrawn WA-w! awgrymodd bardd coronog Eisteddfod Wrecsam yn gryf yr hoffai fod rhyw ddydd yn Archdderwydd.
Does gen i ddim copi o mlaen ar y funud ond dywedodd rywbeth i'r perwyl na fyddai'n dweud 'Na' pe byddai'r gwahoddiad yn dod!
Cafodd y posibilrwydd ei grybwyll eto mewn noson a drefnwyd i ddathlu camp y prifardd newydd yn Y Bontnewydd, y pentref lle mae'n byw.
Y noson honno, cyfarfchodd Hilma Lloyd Edwards, prifardd arall y pentref - a does yna ddim gormodedd o'r rheini chwaith, pentrefi dau brifardd - Geraint gyda'r englyn proffwydol hwn a gyhoeddwyd wedyn yn y papur bro lleol, Lleu:
Haeraf, i'r gair Archdderwydd - (ni rwdliaf!)
ceir odl ysblennydd,
un a ddaw i fod rhyw ddydd,
a honno yw - Bontnewydd!
Yr oedd Gerallt Lloyd Owen yn y noson hefyd - ond does dim sôn a roddodd farciau i'r englyn o ran ei grefft neu ei broffwydoliaeth.
Ac mae dyfalu, siŵr o fod, ai archdderwydd ynteu archdderwyddes ddaw o'r Bont yn gyntaf.
