Cymru i'r byd
Gair o'r Smithsonian
Cyfraniad olaf Kate Crockett, cyflwynydd Stiwdio, o Å´yl y Smithsonian, Washington
Erbyn hyn bydd y pyst rygbi coch a'r waliau cerrig wedi'u dymchwel, y stondinau wedi'u datgymalu, a'r Mall yn wag unwaith eto wedi i Å´yl y Smithsonian yn Washington DC ddod i ben.
Go brin y bydd y 160 a rhagor o Gymry fu'n cymryd rhan eleni yn anghofio'r profiad, a gobeithio y bydd y filiwn a mwy o Americanwyr sydd bellach yn gwybod rhywbeth am Gymru yn cofio'r achlysur hefyd.
Pobl fel Lilith, merch ifanc gafodd ei "chadeirio" gan Ceri Wyn Jones, Ifor ap Glyn ac Aneirin Karadog, mewn sesiwn fythgofiadwy i egluro'r traddodiad eisteddfodol a rhoi gwersi cynghanedd i rai a oedd, mae'n debyg, yn gwybod dim am ein bodolaeth cyn y diwrnod hwnnw.
Wedi'r sesiwn, cawsom sgwrs gyda Ceri Wyn Jones ac Ifor ap Glyn ar gyfer y rhaglen Stiwdio, a thrafod y sefyllfa gartref.
Roedd nifer o'r artistiaid di-Gymraeg o Gymru oedd yn cymryd rhan yn y Smithsonian yn cael eu profiad cyntaf o'r diwylliant Cymraeg ei iaith allan yn Washington. O safbwynt miloedd o drigolion Cymru, boed yn frodorion di-Gymraeg neu'n fewnfudwyr, mae'r diwylliant Cymraeg yn anweledig - is ddiwylliant go iawn nad yw'n cyffwrdd â'u bywydau o gwbl.
Ar ddiwedd pythefnos o ddathlu Cymru ym mhrif ddinas yr Unol Daleithiau, mae'n bosib iawn bod mwy o Americanwyr nac o Gymry di-Gymraeg yn gwybod am Gwyneth Glyn ac am Barti Cut Lloi.
Oes angen gwneud mwy felly i bontio'r ddau ddiwylliant, ac i gynnig cynulleidfaoedd ehangach yng Nghymru i'r llenorion a'r cerddorion gwych sy'n creu eu gwaith yn bennaf trwy'r Gymraeg?
Yr Eisteddfod Genedlaethol yw ffenest siop ein diwylliant ond mae'r rheol Gymraeg yn golygu nad dyna'r lle i gyflwyno'r diwylliant hwnnw drwy'r Saesneg.
Mae Gŵyl y Gelli'n un sy'n ymhyfrydu yn y gair ond yn wahanol i'r Smithsonian mae'r rhai sy'n mynd i'r Gelli yn talu am bob sesiwn yn unigol, gan ei gwneud hi'n anoddach denu pobl sy'n gwybod dim am y testun yn y lle cyntaf.
Yn y Sioe wrth gwrs mae'r croestoriad gorau o Gymry Cymraeg a'r di-Gymraeg ond wn i ddim a fyddai'n bosib rhoi llwyfan teg i'r beirdd drws nesaf i'r bustych.
Felly a oes angen gŵyl newydd?
Yn yr hinsawdd bresennol gyda nifer o'r gwyliau mwyaf yn gwegian yn ariannol, person dewr fyddai'n ceisio trefnu hynny ar raddfa fawr.
Ond os oes angen prawf bod angen gwneud mwy i bontio diwylliannau does ond angen cofio beth ddigwyddodd i Ysgol Glanaethwy wrth berfformio yn Venue Cymru yn Llandudno yn ddiweddar.
Pan fo aelodau di-Gymraeg o gynulleidfa yn gwrthwynebu clywed Cymraeg, ac eraill yn gwrthwynebu defnyddio Saesneg i gyflwyno cerddoriaeth Gymraeg i'r di-Gymraeg, mae'n amlwg bod yma broblem sydd angen sylw brys.
SylwadauAnfon sylw
Beth am rannu'r beichiau ariannol gyda'n cefndyr Celtaidd a sefydlu gwyl ar yr un llinellau a'r un yn Lorient a'i chynnal ar y ffin rhwng Canada a'r UDA . A chanolbwyntio ar bob gwlad Geltaidd ar y tro - fel yn Lorient.